Erlan Qoshanov «Qoǵamdyq baqylaý týraly» zańǵa qatysty pikir bildirdi
«Búgin biz «Qoǵamdyq baqylaý týraly» zań jobasyn qabyldadyq. Bul qujat Memleket basshysynyń tapsyrmasymen ázirlendi. Zań jobasy Májiliste uzaq ári ashyq talqylandy. Talqylaý kezinde Úkimetten kelgen zań jobasy birqatar ózgeriske ushyrady», - dedi E. Qoshanov.
Onyń paıymynsha, qujattaǵy normalar halyqtyń talap-tilegine tolyq saı keledi.
«Óńirlerde jurtshylyqpen kezdesýlerde aıtylǵan usynystardyń barlyǵy qamtyldy. Birinshi kezekte, turǵyndardy áskerı boryshyn ótep júrgen sarbazdardyń qaýipsizdigi alańdatyp otyr. Ekologııalyq ahýal da aımaqtaǵy aǵaıynnyń basty nazarynda. Budan bólek, memlekettik organdarmen birge, kvazımemlekettik uıymdardyń da qyzmetin qadaǵalaýǵa múmkindik týyp otyr. Zań jobasyna petıtsııalar ınstıtýty da engizildi. Endi 50 myń azamat petıtsııaǵa qol qoısa, memlekettik organǵa máseleni qaraý mindetteledi. Mine, osylardyń bári zańǵa engizildi», - dedi Májilis tóraǵasy.
Spıker osy zańnama arqyly azamattardyń qoǵamdyq-saıası ómirge aralasýyna teń múmkindik berý jolynda naqty qadam jasalǵanyn atap ótti.
«Bir sózben aıtqanda, aýqymdy jumys atqaryldy. Bul zań jobasy Prezıdentimizdiń reformalarymen tolyq úndesip tur. Reformalardyń basty prıntsıpi – azamattardyń eldegi qoǵamdyq-saıası ómirge erkin aralasýyna teń múmkindik berý. Qurmetti depýtattar, búgin osy zańdy qabyldaý arqyly biz bul maqsatqa jetý úshin naqty qadam jasadyq», - dedi E. Qoshanov.
Budan buryn habarlanǵandaı, búgin Májilistiń jalpy otyrysynda «Qoǵamdyq baqylaý týraly» zań men ilespe qujat ekinshi oqylymda qaralyp, qabyldandy.
Bul turǵyda memlekettik organdardyń petıtsııany qaraý merzimi qysqartylmaq.