Erlan Qoshanov Qaraǵandynyń tazalyǵy men kelbetine qatysty syn aıtty
Óńir basshysy oblys ortalyǵynda qoqys jáshikteri men qoqys konteınerleri jetispeıtinin atap ótti. Bul Erlan Qoshanovtyń aıtýynsha, qala kósheleriniń lastanýy sebepteriniń biri bolyp tabylady.
«Men sizderdiń nazarlaryńyzdy qoqys jáshikteri barlyq derlik jerlerde turmaǵanyna aýdarǵym keledi. Bar jerlerdiń ózinde ondaǵy qoqysty jınap alyp ketý barysynda shashylyp-tógiledi. Sonyń saldarynan aýlalarda paketter ushyp júredi. Osydan bizdiń sanıtarlyq jaǵdaıymyz nege osyndaı degen suraqqa jaýap alasyzdar», - dep atap ótti Erlan Qoshanov.
Qaraǵandy qalasynyń ákimi Nurlan Áýbákirovtiń aıtýynsha, 600 jańa jáshikke tapsyrys berilgen, jaqyn arada olar qala kóshelerinde ornatylady.
Óńir basshysy, sondaı-aq, oblys ortalyǵynyń syrtqy kelbetine jaýap beretin sáýletshiler men sýretshilerdi synǵa aldy. Sebebi kóshelerde tozyǵy jetken bannerler men áleýmettik jarnama jazylǵan eski bılbordtar jetip-artylady.
«Baqylaý joq. Dúkender satyp alýshylardy tartý úshin mańdaıshalardy bir-birine bekite beredi. PIK ıeleri tabys qýamyz dep úılerdiń qasbetine banerlerdi ornatýǵa ruqsat bere beredi. Nátıjesinde qala turǵyndarynyń ashýyn jáne qala qonaqtarynyń túsinbeýshiligin týdyratyn talǵamsyz kelbetti kórip otyrmyz. Barlyǵyn retke keltirińizder!» - dep talap etti aımaq basshysy.
Erlan Qoshanov bıylǵy jyldyń 11 sáýirinen bastap Jarnama týraly jańa zań kúshine enetinin eske saldy. Osy qujatqa sáıkes, jaıaý júrginshiler men kólik joldaryna shyǵatyn barlyq sórelerge salyq salynady.