Erlan Qoshanov: El tarıhynyń damý kezeńiniń eń jaýapty kezinde turmyz

NUR-SULTAN. QazAqparat - Parlament Májilisiniń jalpy otyrysynda depýtattar Qazaqstan Respýblıkasy Parlamenti Májilisiniń tóraǵasy qyzmetine Erlan Jaqanuly Qoshanovty biraýyzdan saılady, dep habarlaıdy QazAqparat Májilistiń baspasóz qyzmetine silteme jasap.

Erlan Qoshanovtyń kandıdatýrasyn Májilis depýtaty Erlan Saırov usyndy: «Erlan Jaqanuly eńbek jolyn qarapaıym temir sheberinen bastaǵan, eńbek adamynyń múddesin biledi. Zań shyǵarý salasynda keshendi tájirıbesi bar, Parlament Senatynyń depýtaty bolǵan, Ókimettiń Parlamenttegi Ókili qyzmetin atqarǵan. Aımaqtardaǵy halyqtyń, azamattardyń áleýmettik muń-muqtajyn jaqsy biledi. Qaraǵandy oblysynyń Jezqazǵan óńirinde eńbek etken, Qaraǵandy oblysynyń ákimi qyzmetin atqarǵan», - dedi.

Otyrys barysynda Erlan Qoshanov Qazaqstan Respýblıkasy Konstıtýtsııasy 58-babynyń 1-tarmaǵyna sáıkes Qazaqstan Respýblıkasy Parlamenti Májilisiniń Tóraǵasy memlekettik tildi erkin meńgergen Májilis depýtattarynyń arasynan Palata depýtattary jalpy sanynyń kópshilik daýsymen jasyryn daýys berý arqyly saılandy.

Depýtattar aldynda sóz sóılegen Májilis Tóraǵasy Erlan Qoshanov óz kandıdatýrasyn qoldap, senim kórsetken depýtattarǵa rızashylyǵyn bildirdi.

Ómir jolymnyń birqatar ýaqyty osy Parlament qabyrǵasynda ótti. Sizderdiń senimderińizdiń arqasynda, osy abyroıly jumysty birge jalǵastyramyz dep oılaımyn. Parlament Májilisine jetekshilik etý bul, árıne, erekshe mártebe. Bul Qazaqstan halqy men Memleket basshysynyń aldyndaǵy zor úlken jaýapkershilik. Bárimizge belgili, el tarıhynyń damý kezeńiniń eń jaýapty kezinde turmyz. Osy ýaqytta Prezıdentimiz jan-jaqty jáne túbegeıli reformalar usynatynyn atap ótti. Bul reformalardy sapaly zańdarmen qamtamasyz etý barlyǵymyzdyń, ásirese, Májilis depýtattarynyń ortaq mindeti. El múddesi úshin adal eńbek eteıik. Májilistiń jumysyn jańa deńgeıge kótereıik, - dedi Erlan Qoshanov.

(