Erlan Qoshanov: Ata-babamyzdyń erligi máńgi este qalady

QARAǴANDY. QazAqparat - Qaraǵandy qalasynda Jeńis kúni merekesi keń aýqymda atap ótildi. Soǵys ardagerlerin merekemen oblys ákimi Erlan Qoshanov quttyqtady, dep habarlaıdy QazAqparat tilshisi.

Qaraǵandyda Jeńistiń 74 jyldyǵy «Batyrlarǵa taǵzym» sherýinen bastaldy. Myńdaǵan qaraǵandylyq ata-babalarynyń portretterin qalanyń basty kóshelerimen alyp ótti.

Sherýden keıin «Máńgilik alaý» memorıalynda mıtıng-rekvıem boldy. Jınalǵandar qaza tapqan jaýyngerlerdi bir mınýt únsizdikpen jáne qarý-jaraqtan birneshe dúrkin oq atýmen eske aldy. Ajal qushqan qaraǵandylyq-jaýyngerlerdiń rýhyna taǵzym etilip, memorıal aldyna gúl shoqtary qoıyldy.

Erlan Qoshanov ár otbasynyń tarıhy Ekinshi dúnıejúzilik soǵyspen baılanysty ekenin aıtty.

«Elimiz úshin Jeńistiń baǵasy óte qymbatqa tústi. Ol qanshama synǵan taǵdyrlar men qaıǵy-qasiretpen keldi. Myna turǵan bizder, erjúrek atalar men analardyń urpaqtarymyz. Olar bizderge naǵyz otansúıgishtik pen patrıotızmniń qandaı bolatynyn kórsete bilgen úlgi tutar jandar. Ókinishke oraı, surapyl soǵys jyldary erlik tanytqan batyrlarymyzdyń qatary azaıyp barady. Alaıda, biz olardy máńgi este saqtaımyz jáne bolashaq urpaqqa aıtyp otyramyz», - dedi oblys basshysy.

Bul kúni qaraǵandylyqtar Nurken Ábdirovti eske alyp, onyń eskertkishine gúl shoqtaryn qoıdy. Bıyl oblys ushqysh-batyrdyń 100 jyldyǵyn atap ótýde. Soǵys kezinde 23 jastaǵy Nurken Ábdirov óziniń ushaǵyn tsısternalary bar jaý kolonnasyna baǵyttap, óz ómirin qurban etti. Oǵan Keńes Odaǵynyń Batyry ataǵy berildi.

Ekinshi dúnıejúzilik soǵys jyldarynda maıdanǵa 59 935 qaraǵandylyq attandy, onyń 34 352-i oraldy, 25 583-i qaza bolyp, 9 399-y iz-túzsiz joǵaldy.

6 587 qaraǵandylyq erligi úshin ordendermen jáne medaldarmen marapattaldy. 34 qaraǵandylyq Keńes Odaǵynyń Batyry ataǵyna ıe boldy.

Oblys ákimi Erlan Qoshanov ardagerler Asylhan Omarhanov pen Marııa Shınkevıchtiń úıinde qonaqta bolyp, maıdangerlerdi Jeńis kúnimen quttyqtady.

Merekelik sharalar Jeńis saıabaǵynda jalǵasty. Keshke munda Nurken Ábdirovtiń erligine arnalǵan teatrlandyrylǵan qoıylym ótedi. Sahnadan ushqyshtyń ata-anasyna jazǵan maıdan hatyn oqıdy. Kórermender nazaryna sarbazdardyń maıdanǵa attanýy týraly horeografııalyq qoıylym usynylady. Jeńis kúnin toılaý merekelik otshashýmen aıaqtalady.