Erlan Qoshanov ardagerlerdi kele jatqan Jeńis kúnimen quttyqtady
«Qymbatty ardagerler, Sizder bizge beıbit aspan syıladyńyzdar. Sizder Otan úshin, jarqyn bolashaq úshin soǵysyp, jeńisti jaqyndatqan qorǵaýshylarymyzsyzdar. Osy úshin sizderge úlken rahmet! Biz sizderdiń erlikterińizdi umytpaımyz. Uly Jeńis týraly estelikti urpaqtan urpaqqa jetkizetin bolamyz», - dedi aımaq basshysy quttyqtaý sózinde.
Ákim bıyl qaraǵandylyq Keńes Odaǵynyń batyry Nurken Ábdirovtiń týǵanyna 100 jyl tolǵanyn atap ótti.
Ardagerler estelikterimen bólisip, jergilikti bılikke kórsetip jatqan qamqorlyqtary úshin alǵystaryn bildirdi.
«Men Orlov jáne Kýrsk shaıqastarynda kóptegen qaqtyǵystarǵa qatystym. Aýyr jaraqat aldym, biraq gospıtalde emdelgennen keıin maıdanǵa oraldym. 1945 jyly Jeńisten keıin Soltústik-Shyǵys Qytaı men Mońǵolııany japondyqtardan azat etýge qatystym. Bizdiń bastan keshkenimizdi eshkimge tilemeımiz. Alla ony balalar men nemerelerimizge kórsetpesin degim keledi», - dedi 96 jasar ardager Búrkit Esjanov.
Ol 1942 jyly 19 jasynda maıdanǵa attanǵan. Besinshi gvardııalyq atqyshtar dıvızııasynyń quramynda shaıqasqan. 1948 jyly áskerden bosatyldy. Soǵystan keıin úılenip, jarymen birge 8 bala tárbıelep, ósirdi.
100 jasar Nına Sorokına jas urpaqpen baqytty bolýdyń syrymen bólisti. Onyń aıtýynsha, baqyttyń úsh negizgi quramdas bóligi bolady: densaýlyq, otbasy jáne Otan. Ol jastardy beıbit aspandy qadirleýge, salaýatty ómir saltyn ustanýǵa jáne ár kúnge qýanýǵa, óz keleshegin barynsha jarqyn etý múmkindikterin jiberip almaýǵa shaqyrdy.
Saltanatty shara merekelik kontsertpen aıaqtaldy. Ardagerler aldynda ártister súıikti áskerı ánderdi shyrqady.
Búgin Qaraǵandy oblysynda Uly Otan soǵysynyń 95 qatysýshysy men múgedekteri, 10 myńǵa jýyq tyl eńbekkerleri turady. Osy jyly maıdangerler Jeńis kúnine oraı 300 myń teńgeden astam aqshalaı syılyqtarǵa ıe boldy. Ardagerlerge teńestirilgen sanattaǵy tulǵalarǵa birjolǵy kómek 20-dan 100 myń teńgege deıin bolady.