Erlan Qoshanov AMANAT partııasynyń qoǵamdyq qabyldaý alańynda turǵyndarmen kezdesti
Astana qalasynyń turǵyny, eki balanyń anasy Marken Nurlanova erekshe qajettiligi bar balalarǵa arnalǵan qyzmetterdi jetildirý máselesin qozǵady. Onyń aıtýynsha, arnaıy balabaqshalardyń qyzmet aqysy aıyna 250 myń teńgeden 800 myń teńgege deıin ózgerip otyrady.
«Balalarǵa arnalǵan jeke ınklıýzıvti ınfraqurylym baǵasy óte qymbat. Salada bilikti mamandar tapshy, erekshe balalarǵa arnalǵan damytý ortalyqtarynda lıtsenzııa joq, naryqta tıimdiligi dáleldenbegen qosymsha damytý qyzmetteri kórsetiledi. Sonymen qatar, dıagnostıkalyq protsedýralar kezegi úsh aıǵa sozylady, al Densaýlyq saqtaý mınıstrligi nemese Oqý-aǵartý mınıstrligi tarapynan baqylaý júrgizilmeıdi», – dedi ol.
Erlan Qoshanov erekshe qajettiligi bar balalardy jan-jaqty qoldaý máselesine «AMANAT» partııasy árdaıym jiti nazar aýdaratynyn atap ótti. Máselen, byltyr partııanyń «Halyqpen birge!» saılaýaldy baǵdarlamasyn júzege asyrý aıasynda 8 erte aralasý ortalyǵy ashyldy. Bul ortalyqtarda damýy kesheýildegen nemese onyń paıda bolý qaýpi bar jas balalarǵa tıisti kómek kórsetý kózdeledi. Sondaı-aq mektep qabyrǵalarynda 61 ınklıýzııa synyby ashyldy. Partııa Tóraǵasy Marken Nurlanovanyń syn-eskertpesi partııanyń erekshe balalarǵa barynsha qolaıly jaǵdaı jasaý baǵytynda jasap jatqan jumysynda, zań shyǵarý isinde jáne ózge de qyzmetinde eskeriletinin aıtty.
Ekibastuz qalasynyń qurmetti azamaty, jýrnalıst Jumaǵalı Qoǵabaı akademık Qanysh Sátbaev týraly estelikter jınaǵyn shyǵarýdy usyndy. Geolog-ǵalymnyń týǵanyna bıyl 125 jyl tolyp otyr. Mereıtoı Prezıdent tapsyrmasyna sáıkes atap ótiledi. Jýrnalıst bul taqyrypty burynnan beri zerttep-zerdelep júr. Onyń jeke muraǵatynda áıgili ǵalym týraly buryn-sońdy jarııalanbaǵan málimetter de saqtaýly tur.
«Memleket basshysy Qasym-Jomart Toqaev «Egemen Qazaqstan» gazetine bergen suhbatynda el tarıhynda erekshe orny bar tulǵalarǵa qurmet kórsetý dəstúri halqymyzdyń jalpyulttyq biregeıligin nyǵaıtatynyn atap ótti. Sondyqtan partııa kórnekti ǵalym, qoǵam qaıratkeri Qanysh Sátbaevtyń ómir jolyndaǵy beımálim tustaryn jan-jaqty ashyp kórsetetin jınaqty shyǵarýǵa qoldaý kórsetip, «Kitap-AMANAT» partııalyq jobasynyń el aýmaǵyndaǵy kitap ortalyqtarynda jınaqtyń tusaýkeserin ótkizedi», – dedi Erlan Qoshanov.
Aqtóbe turǵyny Rýslan Qazybaev sport sektsııalarynda erekshe bilim berý qajettilikteri bar balalarǵa arnalǵan vaýcherler men jeke kezek engizýdi usyndy. Pavlodar oblysy Shilikti aýylynyń turǵyny Amanjol Rahymjanov medıtsınalyq pýnkt salyp berýdi ótindi. Al Jambyl oblysy Tátti aýylynan kelgen zeınetker Kúlásh Ýtırova tutynýshylyq nesıeni resimdeý kezinde stýdentterge qoıylatyn talaptardy qatańdatýdy usyndy. Qoǵam qaıratkeri Gúlnara Ahmoldına «Qoljetimdi Qazaqstan» jobasyn, ıaǵnı múgedektigi bar adamdar úshin áýejaılardyń, vokzaldardyń, aýrýhanalardyń, sport keshenderiniń jáne ózge de áleýmettik nysandardyń qoljetimdiligi týraly aqparatty alýǵa bolatyn vırtýaldy kartany qoldaýdy surady.
Erlan Qoshanov qaralǵan barlyq ótinish boıynsha partııa fılıaldaryna naqty tapsyrma berip, onyń sheshimin qadaǵalaýdy jeke baqylaýyna aldy.