Erlan Qarınniń tóraǵalyǵymen sıntetıkalyq esirtkimen kúres máselesi talqylandy

ASTANA. QazAqparat – Memlekettik keńesshi Erlan Qarınniń tóraǵalyǵymen QR Prezıdenti janyndaǵy Jastar saıasaty jónindegi keńes músheleriniń Nashaqorlyqqa jáne esirtki bıznesine qarsy keshendi jospardy ázirleýshi ortalyq memlekettik organdar basshylarymen kezdesý ótti. Jıynda sıntetıkalyq esirtkiniń taralýy jiti qaraldy. QazAqparat bul týraly Aqordaǵa silteme jasap habarlaıdy.

Sıntetıkalyq esirtkimen kúres máselesi eń alǵash ret QR Prezıdenti janyndaǵy Jastar saıasaty jónindegi keńestiń 2022 jyly tamyz aıynda ótken otyrysynda qozǵalǵan bolatyn.

Memleket basshysy Qasym-Jomart Toqaev 2022 jyldyń qyrkúıek aıynda jarııalaǵan Joldaýynda sıntetıkalyq esirtkimen kúresti memlekettik saıasattyń basym baǵyttarynyń biri retinde atady. Odan bólek, bul máseleni óziniń saılaýaldy baǵdarlamasyna da engizdi.

Osyndaı strategııalyq qujattardy júzege asyrý aıasynda Qazaqstan Respýblıkasynyń nashaqorlyqqa jáne esirtki bıznesine qarsy 2023-2025 jyldarǵa arnalǵan keshendi josparynyń jobasy ázirlenip jatyr. Bul jumysqa Keńes músheleri de belsendi túrde atsalysýda.

Búgingi kezdesýge Keńes múshelerimen qatar Іshki ister, Densaýlyq saqtaý, Oqý-aǵartý mınıstrlikteriniń basshylary qatysty. Olar sıntetıkalyq esirtkiniń taralýyna qarsy kúres, ázirlenip jatqan Keshendi jospar sheńberinde nashaqorlyqtan emdeý jáne ońaltý máseleleri baǵytynda atqarylǵan jumystar jaıynda baıandady.

Jumys kezdesýiniń sońynda aqparattyq-profılaktıkalyq jumystarǵa jurtshylyqty belsendi qatystyra otyryp, memlekettik organdar úshin naqty usynymdar berildi.