Erlan Qarın jerge qatysty zań jobasyna pikir bildirdi
«Búgin Senat deptýtattary jer týraly prezıdenttik zańdy qarady. Buǵan deıin Senat qabyrǵasynda atalǵan zań jobasy boıynsha jumys toptarynyń 2 otyrysy, Agraralyq máseler, tabıǵatty paıdalaný jáne aýyldyq aýmaqtardy damytý jónindegi komıtettiń 1 keńeıtilgen otyrysy, sonymen qatar Senat bıýrosynyń otyrysy ótti. Jalpy, Senat depýtattary qujatty qoldady. Bul rette talqylaý barysynda senatorlar qarastyrylyp otyrǵan zań jobasyna keıbir ózgertýler engizý usyndy. Osyǵan oraı Senat zań jobasyn engizilgen túzetýlermen Májiliske qaıtarý týraly sheshim qabyldady», - dep jazdy Prezıdent kómekshisi Telegram kanalynda.
Onyń atap ótýinshe, jer týraly prezıdenttik zań jobasynyń tyńǵylyqty ári belsendi talqyǵa túsýi barlyq taraptyń joǵary múddelik tanytyp otyrǵandyǵyn, qoǵamdy bul másele aıryqsha tolǵandyratyn bildiredi.
«Birneshe ret atalyp ótilgendeı, jer týraly prezıdenttik zań jobasy aýyl sharýashylyǵy jerlerin shetel azamattaryna jáne sheteldik kapıtal qatysatyn kompanııalarǵa satýǵa jáne jalǵa berýge shekteý engizýdi kózdeıdi. Sonymen qatar sheteldik tulǵalardyń aýyl sharýashylyǵy jerlerine ıelik etýiniń qandaı da bir múmkinshiligin joıatyn ózge de normalar qarastyrylǵan. Máselen, Qazaqstan Respýblıkasynda tirýelgen kompanııanyń qatysýshylary quramyna sheteldik nemese azamattyǵy joq tulǵa, sheteldik zańdy tulǵa kirgen jaǵdaıda aýyl sharýashylyǵy jerine jekemenshik quqyǵy, sondaı-aq jalǵa alý quqyǵy qaıtaryp alynady. Dál osyndaı ereje Qazaqstan Respýblıkasy azamattyǵy toqtatylǵan tulǵalarǵa da qoldanylady. Mundaı jaǵdaıda aýyl sharýashylyǵy jer ýchaskesi azamattyq toqtatylǵan sátten bastap úsh aıdyń ishinde memleketke qaıtarylýy tıis», - dedi Erlan Qarın.
Aıta keteıik, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine jer qatynastary máseleleri boıynsha ózgerister men tolyqtyrýlar engizý týraly» zań jobasy eki oqylymda qaraldy. Qujatqa túzetýler engizilip, Májiliske qaıtaryldy.