Erlan Qarın: Jańa zań – jalpyulttyq bastama aıasynda qabyldanǵan naqty sharanyń biri

<p>ASTANA. KAZINFORM - Búgin Memleket basshysy áıelderdiń quqyǵy men balalardyń qaýipsizdigin qamtamasyz etý máselelerine arnalǵan zańǵa qol qoıdy. Bul týraly Qazaqstan Respýblıkasynyń Memlekettik keńesshisi Erlan Qarın telegram arnasynda úsh máselege nazar aýdarǵan jón ekenin alǵa tartyp, pikir jazdy.&nbsp;</p>

Memlekettik keńesshisi osy oraıda mynadaı úsh máselege nazar aýdarǵan jón ekenin atap ótti: 

Birinshi. Memleket basshysy Qasym-Jomart Toqaev áýel bastan áıelder men balalardyń quqyqtaryn qorǵaý isine basa mán beredi. Osy jyldarda turmystyq zorlyq-zombylyqqa qarsy kúreske qatysty keshendi sharalar júıesi kezeń-kezeńimen qalyptasty. Búgin qabyldanǵan zań otbasyndaǵy zorlyq-zombylyqqa qarsy is-qımyldy quqyqtyq turǵydan retteý isin qorytyndylaıdy. 

Ekinshi. Turmystyq zorlyq-zombylyqqa qarsy kúrestiń tıimdi mehanızmin jasaý – bılik pen qoǵamnyń syndarly yntymaqtastyǵynyń nátıjesi. Mysaly, bul saladaǵy alǵashqy bastamalar Ulttyq qoǵamdyq senim keńesi músheleri bergen usynystar men usynymdar negizinde ázirlendi. Búgin qabyldanǵan zańdy daıarlaýǵa da Balalardyń quqyqtary jónindegi ýákil, Ulttyq quryltaı men Áıelder isteri jáne otbasylyq-demografııalyq saıasat jónindegi ulttyq komıssııanyń músheleri belsene atsalysty. 

Úshinshi. Jańa zań – Prezıdenttiń qoǵamdaǵy bes keselmen kúresý jónindegi jalpyulttyq bastamasy aıasynda qabyldanǵan naqty sharanyń biri. Prezıdent Atyraýdaǵy sózinde qoǵamdaǵy keseldiń biri retinde turmystyq zorlyq-zombylyqty, býllıng pen agressııany da atap ótti. 
Osy qujatty qabyldaýdyń arqasynda Qazaqstanda zorlyq-zombylyqqa qarsy is-qımylǵa negizdelgen eń ozyq zańnama qalyptasty. Sonymen birge, otbasyndaǵy zorlyq-zombylyqpen tıimdi kúresý úshin qoǵamda agressııanyń kez kelgen túrine tózbeýshilik ustanymyn ornyqtyrý mańyzdy. Sondaı-aq qoǵamda ózara kómek pen syılastyq, basqa adamdarǵa qurmetpen qaraý qundylyqtaryn dáripteý kerek.