Erlan Qarın «Jańa Qazaqstan» uranynyń mánin túsindirdi

NUR-SULTAN. QazAqparat – QR Memlekettik hatshysy Erlan Qarın Prezıdent Qasym-Jomart Toqaevtyń Parlament Májilisiniń keshegi jalpy otyrysynda sóılegen sózi týraly pikir bildirdi, dep habarlaıdy QazAqparat tilshisi.

«Memleket basshysynyń keshegi sóziniń negizgi aıtpaǵy ne? Birinshiden, Prezıdenttiń sózi terrorısterge qarsy kúrestiń sheshýshi kezeńiniń aıaqtalǵanyn bildiredi», - dep jazdy Erlan Qarın Telegram kanalynda.

Aıtýynsha, buǵan deıingi osy másele boıynsha jasaǵan úndeýlerinde Memleket basshysy terrorıstik agressııaǵa toıtarys berý jáne jaǵdaıdy turaqtandyrý jónindegi barlyq is-áreketter týraly habardar etip kelgen. Al keshegi sózinde Prezıdent jańa kún tártibin usynǵan.

«Azamattar, qoǵam jáne elıta úshin erteńgi kúnniń kórinisi belgilendi. Prezıdent usynǵan kún tártibi qoǵamnyń úmitin oıatyp, erteńge degen senim ulıatýǵa jáne kúrdeli problemalardy sheshýdiń syndarly baǵytyn belgileýge arnalǵan. Ol barshamyzdy Jańa Qazaqstandy qurý deıtin úlken jasampaz protseske qatysýǵa shaqyrady. Bul baǵdar barlyq sanaly qoǵamdyq-saıası kúshterdi alǵa jyljý úshin biriktirip, bir maqsatqa shoǵyrlandyrýdy kózdeıdi», - deıdi Memlekettik hatshy.

Erlan Qarın jazbasynda «Jańa Qazaqstan» uranynyń astaryna da úńilgen.

«Jańa Qazaqstan degen neni bildiredi? Bul keıbir sarapshylar usynǵandaı, memlekettik apparatty jańartý ǵana emes. Bul, eń aldymen, qoǵamdyq qundylyqtardy qaıta jańǵyrtý. Radıkalızmnen, ekstremıstik kózqarastar men áreketterden bas tartý, shyǵarmashylyq jasampazdyq jigerdi nyǵaıtý. Qoǵamdaǵy barsha kemshilikterdi eńserý. Bul kezeń-kezeńimen jáne júıeli reformalardy jalǵastyrýdy da bildiredi. Memleket saıasatyn gýmanıtarlyq ólshemmen qarap, adamı kapıtalǵa basymdy beriledi», - dep jazdy Memlekettik hatshyy Erlan Qarın.