Erlan Qarın: «Silk Way Star» jobasyn sheteldiń birqatar telearnalary kórsetýge nıetti

  ASTANA. QazAqparat - Qazaqstandyq telejobaǵa alǵash ret halyqaralyq deńgeıde buqaralyq aqparat quraldary nazar aýdara bastady. Atap aıtqanda, «Qazaqstan» ulttyq arnasynda júzege asqan qazaqstandyq biregeı joba - «Silk Way Star» týraly qazirgi kúni Túrkııanyń, Ázerbaıjannyń, Ózbekstannyń, Qyrǵyzstan men Bashqurtstannyń jáne basqa da elderdiń bedeldi buqaralyq aqparat quraldary jaza bastady. Bul týraly «Qazaqstan» RTRK» AQ Basqarma tóraǵasy Erlan Qarın Feısbýktegi paraqshasynda málim etti.

«Taǵy bir mańyzdy másele, birneshe eldiń telearnalary prime-time efırinde bizdiń jobamyzdy kórsetýge nıet bildirip otyr. Olardyń ishinde: Dream Turk (Túrkııa), Zor TV(Ózbekstan), Tugan TEL (Bashqurtstan), CBC(Ázerbaıjan), KTRK(Qyrǵyzstan), TV Safına TVS (Tájikstan), TNV (Tatarstan) arnalary bar», - dep jazady Erlan Qarın.

Eske sala keteıik, «Qazaqstan» ulttyq arnasynda 30 qyrkúıekten bastap «Jibek Joly Juldyzdary» jobasy kórsetilip keledi.

Aıta keterligi, otandyq televıdenıede mundaı deńgeıdegi halyqaralyq mýzykalyq telejoba buryn-sońdy bolmaǵan. Jobanyń negizgi maqsaty - osy arqyly qazaq mýzykasyn keń turǵyda nasıhattap, shet elderde tanytý. «Jibek Joly Juldyzy» jobasyna 9 eldiń, atap aıtqanda, Qazaqstan, Qyrǵyzstan, Tájikstan, Ózbekstan, Túrkııa, Ázerbaıjan, Grýzııa, Reseı Federatsııasynyń: Tatarstan, Bashqurstan sııaqty elderiniń jarqyn juldyzdary qatysyp, olar bir sahnada baq synasýda.