Erlan Qarın Respýblıka kúni nelikten basty ulttyq merekemiz ekenin aıtty

<p>25 qazan &mdash; Respýblıka kúni nelikten elimizdiń basty ulttyq merekesi? Bul suraqqa óziniń Telegram arnasynda Qazaqstan Respýblıkasynyń Memlekettik keńesshisi Erlan Qarın jaýap berdi, dep jazady Kazinform.&nbsp;</p>

Memlekettik keńesshi Deklaratsııada Qazaqstannyń memlekettik egemendigi, Qazaqstannyń táýelsiz memleket retindegi saıası-quqyqtyq negizderi jarııalandy:

— 1990 jyldyń dál osy kúni elimizdiń Joǵarǵy Keńesiniń otyrysynda 6 saǵatqa sozylǵan qyzý talqylaýlardan keıin Respýblıkanyń memlekettik egemendigi týraly Deklaratsııa qabyldandy.

Jobanyń ózin depýtattar, ǵalymdar, qoǵam qaıratkerlerinen quralǵan top bes aı boıy ázirledi.

Osylaısha Qazaqstan tarıhynda tuńǵysh ret memlekettik qujat belsendi qoǵamdyq talqylaýdan ótti.

Alǵash ret elimizdiń egemendik quqyqtary bekitildi:
- Respýblıkanyń shekara aýmaqtarynyń bólinbeıtindigi men oǵan qol suqpaý qaǵıdattary;
- Respýblıka Konstıtýtsııasy men zańdarynyń ústemdigi;
- Respýblıkanyń azamattyq ınstıtýty;
- Respýblıkanyń memlekettik bıligine ústemdikti, derbestikti, ishki jáne syrtqy saıasattaǵy ókilettikterdiń tolyqtyǵyn bekitý;
- barlyq ulttyq baılyqtar Respýblıkanyń aıryqsha menshigi bolyp jarııalandy (jer jáne onyń jer qoınaýy, sý, áýe keńistigi, ósimdikter men janýarlar dúnıesi, basqa da tabıǵı resýrstar, halyqtyń mádenı jáne tarıhı qundylyqtary, ekonomıkalyq, ǵylymı, tehnıkalyq áleýet);

- Respýblıkanyń halyqaralyq qatynastardyń derbes sýbektisi retinde áreket etý, syrtqy saıasat máselelerin derbes sheshý quqyǵy.

Osylaısha, 1990 jyly 25 qazanda Táýelsizdigimizdi alýdyń alǵashqy qadamy jasaldy.

Respýblıkanyń egemendigi týraly Deklaratsııa – tarıhtaǵy tuńǵysh konstıtýtsııalyq qujat, qazirgi Qazaqstan memlekettiliginiń negizi.

Bir jyldan keıin 1991 jylǵy 16 jeltoqsandaǵy deklaratsııa qaǵıdattary negizinde «Qazaqstan Respýblıkasynyń memlekettik táýelsizdigi týraly» Konstıtýtsııalyq zań elimizdiń Egemen jáne táýelsiz memleket mártebesin túpkilikti bekitti.

Sondyqtan Respýblıka kúni – elimizdiń shynaıy Táýelsizdikke jetý jolyndaǵy batyl qadamynyń basty belgisi.

1995-2001 jyldary bul kún ulttyq mereke retinde atap ótildi. Al ótken jyly Memleket basshysy bul merekeni qalpyna keltirip, Ulttyq mereke mártebesin qaıtarý týraly sheshim qabyldady.