Erlan Qarın repressııa qurbandaryn tolyq aqtaý jónindegi memkomıssııa otyrysyn ótkizdi

ASTANA. QazAqparat – Memlekettik keńesshi Erlan Qarınniń tóraǵalyǵymen Saıası qýǵyn-súrgin qurbandaryn tolyq aqtaý jónindegi memlekettik komıssııanyń kezekti otyrysy ótti, dep habarlaıdy QazAqparat tilshisi.

«Memlekettik komıssııa ǵylymı-zertteý jáne baspa jobalary boıynsha jumysty júıeli túrde jalǵastyrýda. Arhıvtik zertteýler belsendi júrgizilýde. Jabyq qorlardyń materıaldaryn tsıfrlandyrý jáne qupııasyzdandyrý jumystary da jalǵasýda. Bıyl basym jobalar aıqyndaldy. Sondaı-aq jergilikti ǵalymdardy yntalandyrý, óńirlik komıssııalardyń materıaldaryn shyǵarýdy júıeleý mindetteri qoıylǵan bolatyn», – dedi otyrysty ashqan Memlekettik keńesshi.

Otyrysta negizgi baıandama jasaǵan Ǵylym jáne joǵary bilim mınıstri Saıasat Nurbek mınıstrlik óńirlik komıssııalardyń ǵylymı-zertteý jáne baspa qyzmetin súıemeldeý boıynsha júıeli jumys júrgizip jatqanyn aıtty.

«Óńirlik komıssııa músheleri ǵylymı-zertteý jumystary aıasynda arhıvterde, tarıhı ólketaný mýzeılerinde, arhıvtik qujattar men materıaldardy jınaqtap, taldaý jasaýda. Bul baǵytta Almaty, Astana, Shymkent qalalarynda jáne oblystarda óńirlik komıssııalar arhıv materıaldaryn izdeý, jınaý jáne taldaý jumystaryn iske asyryp jatyr», – dedi vedomstvo basshysy.

Komıssııa otyrysyn qorytyndylaǵan Memlekettik keńesshi Erlan Qarın ǵylymı-zertteý jumystaryn jalǵastyrý, arhıv qorlaryndaǵy materıaldardy tereń ári tyńǵylyqty zerdeleý, baspa qyzmetin damytý boıynsha naqty tapsyrma berdi.