Erlan Qarın Prezıdenttik jastar kadrlyq rezerviniń qatysýshylary týraly pikir bildirdi
Júzdesý barysynda jastar Prezıdent Keńesshisine bolashaqta memlekettik qyzmette aınalyssaq degen jobalary týraly áńgimelep, ózderin tolǵandyrǵan saýaldardy qoıdy. Jastardyń bolashaq jobalarymen, josparlarymen muqııat tanysqan Erlan Qarın kezdesý barysynda qyzyqty áńgime órbigendigin aıtty, dep habarlaıdy QazAqparat.
«Búgin Prezıdenttik jastar kadrlyq rezerviniń qatysýshylarymen eki saǵattan astam ýaqyt áńgimelestim. Onlaın formatta ótken talqylaýǵa túrli óńirlerden 60 rezervıst qatysty. Baǵdarlama qatysýshylary ózderi jáne memlekettik qyzmette aınalysqylary keletin jobalarmen tanystyrdy. Bul jobalar óte qyzyqty jáne qazirgi kezde trendke aınalǵan túrli memlekettik qyzmetterdi tsıfrlandyrýdan bastap, ekologııa jáne sý qaýipsizdigi sııaqty túrli taqyryptardy qamtıdy. Jas bolǵanyna qaramastan, kóbiniń bekgraýndy aıtarlyqtaı, 7-den 15 jylǵa deıin kásibı tájirıbesi bar. Óziniń qyzyǵýshylyǵy zor, aldyǵa qoıǵan maqsatyna umtylǵan jas kásibı mamandarmen pikirlesý qashanda qyzyqty. Sondyqtan da biz bolashaqta turaqty túrde kezdesip otyramyz dep kelistik»,-dep jazdy Qarın óziniń Facebook paraqshasynda.
Prezıdenttik jastar kadrlyq rezerviniń qatysýshylarynyń biri Dáýlet Káribek atalǵan kezdesý jóninde bylaı dep jazdy: «QR Prezıdentiniń keńesshisi Erlan Karınmen onlaın kezdesip, óz jobalarymyzben tanystyrdyq. Bul kezdesý jaıshylyqtaǵy onlaın kezdesýler sııaqty emes, árbir rezervıst óz tarapynan baspananyń qoljetimdi bolýy, QQS (NDS) ár túrli bolýy (máselen, birinshi qajettilik ónimderine tómen NDS tómendetý), tsıfrlandyrý, ekologııalyq qaýipsizdik, eksportty qalaı damytýǵa bolady degen sekildi mańyzdy máseleler boıynshy usynys jasady. Karin Erlan aǵamyz 2 saǵattan astam bárimizdi tyńdap, aldaǵy ýaqytta jobany tıisti memlekettik organdarmen birge ortaǵa salýdy usyndy. Osyndaı qıyn-qystaý kezeńde strategııalyq suraqtardy nazarda ustap, ár qaısymyzdy asyqpaı tyńdaǵanyńyz úshin kóp rahmet!»,-dep jazdy.
Al Qýanysh Elikbaev : «Óte qyzyqty áńgime boldy. Prezıdent Keńesshisi Erlan Qarın barlyǵymyzdy muqııat tyńdap, bizdiń suraqtarymyzǵa jaýap berdi. Memleket basshysy Qasym-Jomart Toqaevtyń Prezıdenttik jastar kadrlyq rezervine erekshe nazar aýdaratyndyǵy týraly aıtty. Men ózimdi qyzyqtyrǵan sala týraly áńgimelep berdim. Qyzyqty kezdesý úshin úlken rahmet!»,-dedi ol.