Erlan Qarın: Prezıdent jańa tujyrymdamalardy talqylaýǵa usynady

ASTANA. QazAqparat – Prezıdent jańa tujyrymdamalar men ıdeologemalardy talqylaýǵa usynady. Bul týraly «Qazaqstannyń saıası transformatsııasy: úrdister men keleshek» sarapshylyq forýmynda QR Memlekettik keńesshisi Erlan Qarın aıtty, dep habarlaıdy QazAqparat.

«Jańa ádep men jańa qundylyqtardy ilgeriletý qajet. Prezıdent óńirlerge saparynda buǵan nazar aýdaryp, eńbek ǵurpyn, bilimniń mańyzdylyǵyn, ózara kómek pen yntymaqtastyq qundylyǵyn nasıhattaýy kezdeısoq emes. Sonymen qatar Prezıdent ulttyq biregeılikke jańa kózqaras qalyptastyrdy. Onyń basty sımvoly - kók pasportymyz», - dedi Erlan Qarın.

Onyń atap ótýinshe, Prezıdenttiń kók pasportymyz týraly aıtqan sózinde azamattyq biregeılikke degen úndeýi bar.

«Memleket basshysy jańa tujyrymdamalar men jańa ıdeologemalardy talqylaýǵa usynady», - dedi ol.

Memlekettik keńesshi elimizde «Mádenı mura», «Rýhanı jańǵyrý» jáne basqa da baǵdarlamalar iske asyrylǵanyn atap ótti.

«Olar mádenı murany saqtaýda, rýhanııatty, tarıhı sanany damytýda ról atqardy. QSZI jazdan bastap, qoǵamdyq qundylyqtardyń bazalyq matrıtsasy máselelerimen aınalysyp jatyr. Bul aýqymdy jumystyń fılosofııa, saıasattaný, áleýmettaný, tarıh jáne mádenıettaný salasyndaǵy jetekshi sarapshylardyń ortaq jobasy bolǵany durys bolar edi», - dedi Erlan Qarın.