Erlan Qarın: Prezıdent lıberalızatsııaǵa den qoıyp otyrǵanyn taǵy bir márte dáleldedi

NUR-SULTAN. QazAqparat – Prezıdenttiń keńesshisi Erlan Qarın Memleket basshysynyń Qazaqstan halqyna Joldaýyna qatysty pikir bildirip, qandaı baǵyttarǵa basymdyq berilgeli otyrǵanyn aıtyp berdi, dep habarlaıdy QazAqparat tilshisi.

«Prezıdent búgingi Joldaýy arqyly saıası básekeniń ósýin, kóppartııalyqty damytýdy, dıalogty kúsheıtýdi kózdep otyr. Meniń oıymsha, Memleket basshysy lıberalızatsııa baǵdaryna den qoıyp otyrǵanyn taǵy bir márte dáleldedi. «Reforma úshin reforma júrgizýdiń» qajeti joq ekenin ashyq bildirdi. Reformalardy iske asyrýda oıly da ólshengen qadamdar bolýy kerektigin aıtty», - dedi Erlan Qarın Parlamenttiń birlesken otyrysynan keıin tilshilerdiń saýaldaryna jaýap bere otyryp. Prezıdenttiń keńesshisi óz sózinde taǵy da birshama bastamalardy atap ótti. «Prezıdenttiń saıası keńesshisi retinde qoǵamdyq dıalogty damytý, azamattyq dıalogty kúsheıtý týraly bastamalaryn erekshe atap óter edim. Álbette, Prezıdent tarapynyń shaǵyn jáne orta bıznesti damytý bastamasynyń da mańyzy zor. Memleket basshysy mıkro jáne shaǵyn bıznesti salyqtan úsh jylǵa bosatý týraly Úkimetke zańnamalyq negiz ázirleýdi tapsyrdy. Meniń oıymsha, bul kásipkerlikti damytýda óte keremet jiger beredi. Jalpy, Joldaý óte úılesimdi boldy», - dedi Erlan Qarın. Eske sala ketsek, búgin QR Prezıdenti Qasym-Jomart Toqaev Qazaqstan halqyna Joldaýyn jarııalady.