Erlan Qarın nashaqorlyqqa qarsy keshendi jospar qurylatynyn málimdedi

ASTANA. QazAqparat - Memleket basshysy byltyr qyrkúıek aıynda jarııalaǵan Joldaýynda sıntetıkalyq esirtkiniń taralýyn ult densaýlyǵyna zııan keltiretin basty qaýiptiń biri retinde atady. Bul týraly Memlekettik keńesshi Erlan Qarın áleýmettik jelidegi paraqshasyna jazdy, dep habarlaıdy QazAqparat.

Erlan Tynymbaıuly sol sebepti nashaqorlyq pen esirtki bıznesine qarsy kúres Prezıdenttiń saılaýaldy baǵdarlamasynyń basym baǵyttarynyń biri bolyp belgilengenin atap ótken.

«Prezıdent janyndaǵy Jastar saıasaty jónindegi keńes sıntetıkalyq esirtkiniń taralýyna qatysty qaýipti alǵashqylardyń biri bolyp kóterdi. Oǵan barsha qoǵamnyń nazaryn aýdardy.

Sondyqtan búgin Qazaqstan Respýblıkasynyń nashaqorlyqqa jáne esirtki bıznesine qarsy 2023-2025 jyldarǵa arnalǵan keshendi josparynyń Keńes alańynda talqylanýy bekerden-beker emes. Jospar boıynsha joba 7 bólimnen jáne 64 pýnktten turady. Ol eń aldymen, nashaqorlyqtan ońaltýdy jáne esirtkige táýeldiler sanyn azaıtýdy kózdeıdi. Osy arada mundaı jospardyń 2016 jyldan beri qabyldanbaǵanyn aıta ketý kerek», - dedi Memlekettik keńesshi.

Onyń paıymynsha, keshendi jospardy tıimdi júzege asyrý úshin memlekettik organdar men azamattyq qoǵam ınstıtýttary tyǵyz baılanysta jumys isteýi qajet. Jastar saıasaty jónindegi keńes nashaqorlyqqa qarsy qoǵamdyq qozǵalystyń bastamashylarynyń biri retinde Keshendi jospardyń ázirlenýine, sondaı-aq qabyldanýyna belsendi túrde atsalysady. Al sonan soń onyń oryndalýyn óz baqylaýynda ustaıtyn bolady.