Erlan Qarın Murat Áýezov týraly: parasat-paıymy joǵary, bilimi tereń, oıy ozyq, ustanymy berik tulǵa edi

<p>ASTANA. KAZINFORM - Murat Áýezov &ndash; parasat-paıymy joǵary, bilimi tereń, oıy ozyq, ustanymy berik tulǵa edi. Bir boıyna san túrli qasıet qonǵan, bir ózi birneshe baǵytta eńbektengen ámbebap azamat bolatyn, dep jazdy búgin QR Memlekettik keńesshisi Erlan Qarın óziniń Facebook paraqshasynda.</p>

«Mádenıettanýshy, shyǵystanýshy, dıplomat, jazýshy, qabyrǵaly qaıratker retinde ult rýhanııatyn baıytýǵa, ádebı-mádenı ómirdiń órkendeýine, qoǵamdyq-saıası úderisterdiń alǵa basýyna eleýli úles qosty»,-dep jalǵastyrdy Memlekettik keńeshi.

Budan bólek ardaqty áke, uly tulǵanyń laıyqty perzenti boldy. Asqartaý ákeniń atyn óz bıiginde jalǵastyrdy. Asyldyń synyǵy, altynnyń qıyǵy, jaqsynyń jalǵasy ǵana bolyp qoıǵan joq, óziniń soqpaǵyn qalyptastyryp, Áýezov degen abyroıly tekti tuǵyrynan túsirmedi.

«Biz Murat aǵany jas kezimizden tanıtyn edik. Almatyda turǵanymyzda etene aralasyp, jıi pikirlesip júretinbiz. Birde úsh kisi bolyp Qyrǵyzstanǵa saparmen baratyn boldyq. Aramyzda Murat Áýezov te bar. Biz birden ushaqpen emes, kólikpen barýdy usyndyq. Onda da mashınany ózim júrgizip baratynymdy aıttyp, «Sizge júrgizýshi bolý biz úshin úlken mártebe ǵoı, aǵa. Sharshaıtyn eshteńesi joq» degenimizde, ol kisi jyly jymıyp kelisken bolatyn.

Sol saparymyz esten shyqpaıdy. Ár tóbeniń tarıhyn, ár qyrattyń oqıǵasyn, ár taýdyń shejiresin aıtty desem, ótirik bolmas. Tórt kúndeı ýaqyt qasynda júrip, shamamyz kelgenshe qyzmet qylyp, tálimdi sózin tyńdap, tárbıeli ósıetin estip, kóńilimiz shat-shadyman kúı keship edi. Sol kezde Murat aǵanyń boıyndaǵy zııalylyq pen bııazylyqtyń belgisin anyq tanydyq. Shetsiz biliminiń bir bóligin kórdik.

Odan keıin de qoǵamdyq-saıası jumystar barysynda kórisip, oraıy kelgende jolyǵyp otyrdyq.

2022 jyly Prezıdent Semeıge jumys saparymen baryp, Muhtar Áýezov pen Qaıym Muhamedhanovqa, ıaǵnı ustaz ben shákirtke eskertkish ashty. Sol is-sharaǵa Murat aǵa da qatysyp, Memleket basshysy ekeýi sýretke tústi. Osy sýretti kórgende erekshe qýanǵanymyzdy jasyrǵym kelmeıdi. Eldik iste qaıratkerlerdiń bir sapta qatar turǵany qashan da jarasymdy ǵoı. Onan soń keıin Qasym-Jomart Kemeluly Murat Áýezovti Aqordaǵa shaqyryp, arnaıy memlekettik nagrada tapsyrdy. Bul da taǵylymdy shara edi.

Murat Áýezov ómirden ótipti degen aqparatty oqyǵanda oıymyzǵa onyń osyndaı bolmysy oraldy»,-dedi Erlan Qarın.

Osyǵan deıin Murat Áýezoviń 81 jasynda dúnıeden ótkenin jazǵan edik.

Búgin Prezıdent memleket jáne qoǵam qaıratkeri Murat Áýezovtiń otbasy men jaqyndaryna kóńil aıtty.