Erlan Qarın QSZI Ǵylymı keńesiniń otyrysyna qatysty

<p>ASTANA. KAZINFORM &ndash; Memlekettik keńesshi Erlan Qarın Prezıdent janyndaǵy Qazaqstannyń strategııalyq zertteýler ınstıtýty (QSZI) Ǵylymı keńesiniń keńeıtilgen otyrysyna qatysty, dep habarlaıdy Aqorda.</p>

Jıynda ınstıtýttyń 2025 jylǵa josparlanǵan taldaý jumysynyń negizgi baǵyttary men mańyzdy is-sharalary talqylandy. Atap aıtqanda, QSZI el damýynyń ishki saıası úderisteri men ekonomıkalyq úrdisterin zertteýge, sondaı-aq syrtqy saıası ahýaldy baǵamdaýǵa basa mán beredi. Buǵan qosa Instıtýt derekter bazasyn qurý jáne aımaqtardaǵy ókildikter jelisin keńeıtý jumystaryna aıryqsha nazar aýdarady.

Memlekettik keńesshi Prezıdent Qasym-Jomart Toqaev jyl basynda bergen suhbatynda memlekettik saıasattyń negizgi baǵyt-baǵdaryn aıqyndap bergenin atap ótti.

Erlan Qarınnyń aıtýynsha, júzege asyrylyp jatqan memlekettik saıasatty saraptamalyq-taldamalyq turǵydan súıemeldeý isinde QSZI aıryqsha ról atqarady. Sondaı-aq qurylymnyń aımaqtardy damytý jóninde usynystar ázirleý, ekonomıkalyq reformalardy odan ári ilgeriletý, geosaıasattyń jahandyq úrdisterin taldaý jáne basqa da ózekti ári suranysqa ıe baǵyttar boıynsha mańyzy zor. Instıtýt sarapshylary memlekettik ishki jáne syrtqy saıasattyń negizgi maqsat-mindetterin sarapshylar qaýymdastyǵyna ǵana emes, barsha jurtshylyqqa túsindirýge de erekshe atsalysyp júr.

Budan bólek, Erlan Qarın QSZI elimizdiń basty zııatkerlik ortalyǵy retinde sheteldiń saraptamalyq ortalyqtarymen halyqaralyq deńgeıdegi seriktestik baılanys ornatý isinde negizgi qurylym sanalatynyn jetkizdi.

Buǵan deıin Erlan Qarın esirtki tasymaldaýshy jastardyń jazasyn jeńildetýge qatysty pikir bildirdi.