Erlan Qarın: Konstıtýtsııa - bul ulttyń saıası manıfesi

ASTANA. QazAqparat - Memleket basshysy Nursultan Nazarbaev eldegi konstıtýtsııalyq reformalarǵa qatysty QR Konstıtýtsııasynyń 26-babyn ózgerissiz qaldyrýdy usynǵan bolatyn. Osyǵan baılanysty saıasattanýshy, «Qazaqstan» RTRK» AQ basshysy Erlan Qarın áleýmettik jelidegi paraqshasynda óz pikirin bildirdi, dep habarlaıdy QazAqparat.

Ulttyq arna basshysynyń aıtýynsha, Elbasynyń Memlekettik bılik tarmaqtary arasynda ókilettikterdi qaıta bólý máseleleri jónindegi jumys tobynyń otyrysynda jasaǵan málimdemesi saıası reformalardyń mańyzdylyǵyn odan saıyn arttyryp otyrǵan sekildi.

«Konstıtýtsııa bul tek qana quqyqtyq normalardyń jıyntyǵy emes, bul eń bastysy, saıası qundylyqtar men prıntsıpterdiń tujyrymdamasy, ulttyń saıası manıfesti. Osy turǵydan qaraıtyn bolsaq, bul reformalar - sol engiziletin ózgeristerden basqa, damýdyń jańa paradıgmalaryn aıqyndaıtyn sııaqty. Onyń biri, Elbasy óz sózinde aıtqanyndaı, qoǵamda prıntsıpıaldy máseleler boıynsha konsensýs, kelisim bolýy qajet. Búgin osy qaǵıdat taǵy da kórinis tapty. Sondyqtan, bul reformalardy jáı Konstıtýtsııalyq ózgerister dep emes, memlekettik saıasattaǵy paradıgmalyq ózgerister dep qabyldaý qajet», - dep jazady Erlan Qarın feısbýktegi paraqshasynda.

Esterińizge sala keteıik, bılik tarmaqtary arasynda ókilettiliktedi qaıta bólý jónindegi reformalar aıasynda Prezıdenttiń birqatar ókilettilikterin Úkimet pen Parlamentke berý kózdelgen. Sonyń ishinde respýblıkalyq bıýdjetti bekitý de bar. Úkimet arnaıy komıssııany da, bıýdjetti atqarý tártibin de ózi bekitedi. Al Parlament el qazynasyn jumsaýdy baqylap otyrady . Osyǵan qatysty arnaıy zań jobasy jaqynda Parlamenttiń qaraýyna engizý kózdelip otyr. Al Konstıtýtsııanyń 26-babyn Prezıdenttiń ózi ózgerissiz qaldyrýdy usyndy .