Erlan Qarın: Qoǵam sanasyndaǵy qasań túsinikter kelmeske ketpese, aýqymdy reformalar nátıje bermeıdi

<p>ASTANA. KAZINFORM &ndash; Eskishildik pen órkenıetti damý joly eshqashan bir arnaǵa toǵyspaıtynyn aıtqan QR Memlekettik keńesshisi Erlan Qarın keıbir mańyzdy sátte rýshyldyqtyń da qylań beretinin atap ótti.</p>

Bul týraly ol «Egemen Qazaqstan» gazetinde jarııalanǵan maqalasynda aıtty.

«Qoǵam sanasyndaǵy jáne jurttyń minez-qulqyndaǵy ábden eskirgen qasań túsinikter men uǵymdar kelmeske ketpese, saıasat pen ekonomıkadaǵy aýqymdy reformalar esh nátıje bermeıdi. Mysaly, 2022 jyly qoǵam ókilderiniń usynysymen Májilis jáne máslıhat depýtattaryn aralas saılaý júıesi engizildi. Ókinishke qaraı, is júzinde bir mandatty okrýgterdiń keıbireýinde oń úrdispen qatar jaǵymsyz jaıttar da boldy. Ashyǵyn aıtsaq, birqatar okrýgte baǵdarlamalar men ıdeıalarǵa negizdelgen erkin báseke túrindegi saıası kúreske kýá bola almadyq. Onda aldymen rýshyldyqqa jol berildi. Tipti keıbir jerde qylmystyq toptar bılikke enýge de áreket jasady. Jańa saıası mádenıet qalyptastyrmaı, jasampaz qundylyqtar negizinde qoǵamdyq etıkany jańartpaı, ádiletti qoǵam qurý múmkin emes ekeni aıdan anyq», - dedi Erlan Qarın.

Memlekettik keńesshi Prezıdent Atyraýda sóılegen sózinde jalpyulttyq qundylyqtardy naqty aıqyndap bergenin aıtty.

«Memleket basshysy jalpyulttyq qundylyqtardy bir tujyrymdamaǵa biriktirip, ulttyń jańa sapasyn qalyptastyrýǵa múmkindik beretin ıdeologııalyq baǵyt-baǵdarymyzdyń biryńǵaı júıesin jasady. Sondyqtan osy ıdeologııalyq-gýmanıtarlyq tuǵyrnama ishki saıasattaǵy bilim men tárbıe berý, mádenı-aǵartý jumystarynyń basty baǵytyna aınalýy kerek. Ulttyq quryltaıdaǵy bastamalardy júzege asyrý úshin 40 tarmaqtan turatyn keshendi jospar bekitildi. Osy qujattyń aıasynda jyl sońyna deıin 9 zań qabyldaý josparlanǵan. Qazirdiń ózinde onyń úsheýin Parlament maquldap, Prezıdent qol qoıdy», - dedi Memlekettik keńesshi.