Erlan Qarın Qazaqstan tarıhy kóptomdyǵynyń ǵylymı-redaktsııalyq keńesiniń jumysyna qatysty

<p>ASTANA. KAZINFORM &ndash; Qazaqstan Respýblıkasynyń Memlekettik keńesshisi Erlan Qarınniń tóraǵalyǵymen &laquo;Qazaqstan tarıhy: ejelgi dáýirden búginge deıin&raquo; atty akademııalyq kóptomdyq basylymnyń ǵylymı-redaktsııalyq alqasynyń kóshpeli otyrysy ótti, dep habarlaıdy Aqorda.</p>

Alqa quramyna Ǵylym jáne joǵary bilim mınıstrliginiń ókilderi, elimizdiń ǵylymı-zertteý ınstıtýttarynyń jáne memlekettik arhıvtiń basshylary men qyzmetkerleri, tarıhshy ǵalymdar jáne sarapshylar endi.

Atap aıtqanda, jıynǵa Á.Marǵulan atyndaǵy Arheologııa ınstıtýtynyń dırektory Aqan Ońǵar, Sh. Ýálıhanov atyndaǵy Tarıh jáne etnologııa ınstıtýtynyń bas dırektory Zııabek Qabyldınov, Joshy Ulysyn zertteý ınstıtýtynyń dırektory Jaqsylyq Sábıtov, R.B. Súleımenov atyndaǵy Shyǵystaný ınstıtýty janyndaǵy Tarıhı materıaldardy zertteý respýblıkalyq aqparattyq ortalyǵynyń dırektory Merýert Ábýseıitova, Sh. Ýálıhanov atyndaǵy Tarıh jáne etnologııa ınstıtýtynyń bas ǵylymı qyzmetkeri Bolat Kómekov, Memleket tarıhy ınstıtýty dırektorynyń orynbasary Búrkitbaı Aıaǵan, Sh. Ýálıhanov atyndaǵy Tarıh jáne etnologııa ınstıtýty bas dırektorynyń orynbasary Erjan Toraıǵyrov jáne basqa da mamandar qatysty.

Kezdesý barysynda Erlan Qarın redaktsııalyq alqany aldaǵy eki aptada aýqymdy jumys kútip turǵanyn, basty mindet kóptomdyq qoljazbasyna ǵylymı saraptama jasaý ekenin atap ótti. 

Foto: akorda.kz

Memlekettik keńesshi zamanaýı ǵylymı ádisterdi qoldana otyryp jazylǵan Qazaqstan tarıhynyń kóptomdyq basylymyn daıyndaý týraly bastamany Memleket basshysy Qasym-Jomart Toqaev 2021 jylǵy qańtarda jarııalanǵan «Táýelsizdik bárinen qymbat» atty maqalasynda kótergenin eske saldy. Osy akademııalyq basylym el tarıhy jónindegi barlyq mektep pen ýnıversıtet baǵdarlamalaryna jáne oqýlyqtaryna negiz bolýǵa tıis.

Erlan Qarın osy jyldar ishinde Qazaqstan tarıhy kóptomdyǵyn daıyndaý úshin aýqymdy jumys atqarylǵanyn, oǵan elimizdegi ǵylymı qaýymdastyqtyń barlyq derlik ókilderi qatysqanyn atap ótti.

Ár tomǵa ǵylymı jetekshilikti Qazaqstannyń bes ǵylymı zertteý ınstıtýty júzege asyrdy. Olar: Sh. Ýálıhanov atyndaǵy Tarıh jáne etnologııa ınstıtýty, Á. Marǵulan atyndaǵy Arheologııa ınstıtýty, Joshy Ulysyn zertteý ınstıtýty, R. Súleımenov atyndaǵy Shyǵystaný ınstıtýty jáne Memleket tarıhy ınstıtýty.

Jalpy, biregeı jobaǵa elimizdiń 250 tarıhshysy maqala jáne bólim avtory retinde óz úlesin qosty.

Kóptomdyq basylymnyń qoljazbasyna qatysty jumys áli jalǵasady. Túrli saraptamalyq talqylaýlar men ǵylymı zertteýler josparlanǵan. Sonymen qatar kóptomdyqqa sapaly ǵylymı ıllıýstratsııalyq qujattardy, tarıhı kartalardy, arhıv qujattarynyń fotokóshirmelerin jáne respýblıkalyq, sondaı-aq ólkelik mýzeıler men arhıvterden alynǵan basqa da materıaldardy engizý jóninde aýqymdy jumys júrgiziledi.