Erlan Qarın: Aýyl ákimderiniń 50%-dan astamy - jańadan saılanǵandar

NUR-SULTAN. QazAqparat – Bıyl alǵash ret elimizde aýyl ákimderiniń saılaýy ótti. Osy oraıda saılanǵan aýyl ákimderiniń 50%-dan astamy osy laýazymǵa jańadan kelip otyr eken. Bul týraly QR Prezıdentiniń kómekshisi Erlan Qarın málim etti, dep habarlaıdy QazAqparat tilshisi.

«Aýyl ákimderin saılaýy shildedegi sharýamen bitken joq. Ár apta saıyn elimizdiń belgili bir aýylynda ákim saılaýy ótip jatyr. Búginde elimizde 2300-den astam aýyl ákimi bar. Bıyl shilde de 730 aýyldyń ákimi saılandy. Odan beri taǵy 100 aýyldyń basshysy qaıta tańdaldy. Osylaı jalǵasa beredi. Óıtkeni, saılaý aýyl ákiminiń qyzmettik merzimine baılanysty ótedi. Osy oraıda saılanǵan aýyl ákimderiniń jańarýy 52 paıyzdy qurap otyr. ıAǵnı ákimderdiń 50 paıyzdan astamy jańa adamdar. Mysaly, keshe ǵana jańalyqtardan oqydym Talǵardyń ákimi bolyp dáriger maman saılanǵan», - dedi Erlan Qarın «Habar 24» telearnasyna bergen suhbatynda.

Sondaı-aq, Prezıdent kómekshisi ózin-ózi usynyp, halyqtyń qoldaýyna ıe bolyp saılanǵan aýyl ákimderiniń de baryn aıtty.

«Osylaısha Memleket basshysynyń bul reformasy el basqarýǵa nıetti azamattar men aýyl halqynyń únimen sanasýǵa múmkindik berdi. Saılaýdan bólek, aýyl ákimdigi apparaty qyzmetkerleriniń biliktiligin jetildirýde nazardan tys qalǵan joq. Qazirgi ýaqytta 1 myńnan astam qyzmetker óz bilimin jetildirdi. Sonymen qatar aýyl ákimderiniń jalaqysy da ósti. Buryn olardyń aılyǵy 130 myń teńgeni qurasa, qazir 400 myń teńgege jýyqtaıdy», - deıdi ol.

Aıta ketsek, QR Prezıdentiniń kómekshisi Erlan Qarın Memleket basshysy Qasym-Jomart Toqaevtyń Joldaý aıasynda júktegen mindetterdiń qalaı iske asyp jatqany týraly aıtyp berdi