Erlan Qarın «Ardagerler týraly» Zańǵa qatysty pikir bildirdi
«Búgin, Otan qorǵaýshylar kúni Prezıdent Qasym-Jomart Toqaev «Ardagerler týraly» Zańǵa qol qoıdy. Bul zańmen aǵa urpaq ardagerlermen qatar, Táýelsizdik jyldary (Tájik-Aýǵan shekarasy men Irakta) áskerı boryshyn atqarǵan ardagerlerdiń de áleýmettik jaǵdaıy qamtamasyz etiledi», - dep jazdy E. Qarın áleýmettik jelidegi paraqshasynda .
Osy oraıda ol bul zańnyń birqatar normalary Ulttyq keńestiń aıasynda kóterilip, talqylanǵanyn eske saldy.
«Sol usynystarǵa qatysty Prezıdent Úkimetke, tıisti memlekettik organdarǵa tapsyrma berip, óz baqylaýyna alǵan bolatyn. Sondyqtan, bul zańnyń qabyldanýy Memleket basshysynyń ardagerlerimizge laıyqty qamqorlyq kórsetýdiń taǵy bir kórinisi», - dedi Erlan Qarın.
Aıta keteıik, Memleket basshysy «Ardagerler týraly» Qazaqstan Respýblıkasynyń Zańyna qol qoıǵan bolatyn.
Budan buryn habarlanǵandaı, 30 sáýir kúni Parlament Senatynyń jalpy otyrysynda «Ardagerler týraly» Zańy qabyldandy.
Zań jobasynyń negizgi maqsaty – ardagerlerdi áleýmettik qorǵaýǵa baılanysty qoǵamdyq qatynastardy retteıtin zańnamalyq aktilerdi júıeleý, qaıta qaraý jáne ardagerlerdiń jańa sanattaryn qalyptastyrý.
Sonymen qatar, jalpy otyrysta «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» ilespe Zań eki oqylymda qaralyp, qabyldandy.
Ony ázirleý qajettiligi birqatar zańnamalyq aktilerdi «Ardagerler týraly» zań jobasyna sáıkes keltirýmen baılanysty. Negizgi jańa ózgerister áleýmettik tólemderge qatysty bolyp otyr.