Erlan Aıtahanov Tsıtadeldegi arheologııalyq qazba jumystarmen tanysty

ShYMKENT. QazAqparat – Búgin Shymkent qalasynyń ákimi Erlan Aıtahanov Eski qalashyqtaǵy qazba jumystary júrgizilip jatqan Tsıtadelge baryp, ondaǵy qurylys jumystaryn aralap kórdi, dep habarlaıdy QazAqparat tilshisi.

Qurylysshylarmen kezdesken shahar basshysy eski qalashyqtaǵy jumystar 2020 jyly óz merziminde aıaqtalýy tıis ekenin basa aıtty.

Arheologtar jáne qurylysshylarmen bolǵan kezdesýde ákim Eski qalashyq aýdanynyń tarıhı josparlaý qurylysyn barynsha saqtaýdy eskertti. Aıta keteıik, búginde qalanyń 2200 jyldyq tarıhyn aıshyqtaıtyn eski qalashyqtyń qurylys jumystaryn «Qarjan Taý» qurylys kompanııasy júrgizýde. Tsıtadeldegi arheologııalyq qazba jumystarymen 100-ge jýyq maman aınalysýda. Merdiger Álıhan Batyrhanuly keler jyly ótetin TMD elderiniń mádenı astanasymen tuspa-tus kelgen Shymkenttiń 2200 jyldyǵynda atalǵan nysandy sapaly ári ýaqtyly tapsyrý úshin bar kúshin jumyldyryp jatqanyn aıtty. «Búginde aýmaǵy 5,03 gektardy quraıtyn tsıtadelde 120-dan astam qurylysshy jumys isteýde. Olar aýa raıynyń qolaısyzdyǵyna qaramastan tapsyrysty ýaqytynda oryndaý úshin talmaı eńbek etýde. Bizdiń basty maqsatymyz - qurylysty sapaly oryndaý, sondyqtan munda bilikti mamandar jumys isteýde, - dedi kompanııa basshysy.