Erlan Ábil: Memqyzmetshilerdi kásiptik oqytý júıesine «jasyl ekonomıka» qaǵıdattary engiziledi
Erlan Qýanyshuly Qazaqstandaǵy memlekettik qyzmetshilerdi kásiptik oqytý júıesi jańa ınnovatsııalardy qalaı engizip, «jasyl» ekonomıkalyq transformatsııaǵa qol jetkizýge qandaı jolmen yqpal etetinin aıtty.
«Klımattyq ózgerister men energetıkalyq turaqtylyqqa baılanysty ekologııalyq kún tártibi Eýrazııa kontınentiniń keńistiginde ekonomıkalyq jáne saıası qatynastardyń belsendi faktory retinde Qazaqstan úshin óte ózekti bolyp otyr. Bul rette memlekettik basqarý organdaryna jáne memlekettik qyzmetshilerge úlken mindetter júkteledi. Memlekettik basqarý akademııasy adamgershilik qasıetteri joǵary, jańa formattaǵy menedjerlerdi daıarlaý baǵytynda qyzmet etedi. «Jasyl ekonomıka» qaǵıdattaryn engizý oqytý baǵdarlamalarynda da, zertteý komponenti arqyly da júzege asady. Osy jyly Memlekettik basqarý akademııasynda «Ortalyq Azııadaǵy klımattyq turaqtylyq pen qaýipsizdikti qamtamasyz etý úshin sý sektorynda joǵary bilim berýdi nyǵaıtý» atty Erasmus+ jobasy bastalady», – dedi akademııa rektory.
Sonymen qatar Erlan Ábil akademııanyń memlekettik qyzmetshilerdi daıarlaý baǵytyndaǵy josparlaryn da bólisti.
«Memlekettik basqarý akademııasy – memlekettik basqarýda neksýstyq baǵalaýdy oqytý kózdeletin «Ortalyq Azııa elderiniń memlekettik laýazymdy tulǵalaryn sý, energetıka, azyq-túlik, ekojúıe resýrstarynyń ózara baılanysyn baǵalaýdy ilgeriletý boıynsha oqytý» jobasynyń qatysýshysy. Sondaı-aq bıyl Akademııada memlekettik qyzmetshilerge «jasyl», tómen kómirtekti jáne turaqty damý prıntsıpteri boıynsha bilim berý jobasyn iske qosý josparda bar», – dep atap ótti ol.