Erli-zaıypty alaıaqtarǵa kómektesken: polıtsııa SIM-box qurylǵylary men kartalar tárkiledi

<p>PAVLODAR. KAZINFORM &ndash; Pavlodar qalasynda polıtsııa qyzmetkerleri &laquo;telefon&raquo; alaıaqtaryna kómektesken otbasylyq jupty ustady, dep habarlaıdy Polisia.kz.</p>

Jedel izdestirý is-sharalary ІІM kıberqylmysqa qarsy is-qımyl departamentiniń úılestirýimen júrgizildi.

– Jaldamaly páterde árqaısysynda 8 sloty bar 5 sim-box qurylǵysy anyqtaldy. Onda qazaqstandyq uıaly baılanys operatorlarynyń sim-kartalary ornatylǵan. Olardyń kómegimen respýblıka aýmaǵynda ınternet-alaıaqtyq jasaý úshin qoldanylatyn vırtýaldy abonenttik nómirler tirkelgen. Sonymen qatar 4 roýter men qazaqstandyq jáne sheteldik baılanys operatorlarynyń 53 sim-kartasy tárkilendi. Ustalǵandar polıtsııaǵa jetkizildi. Anyqtalǵandaı, olardyń mindetine apta saıyn qurylǵylardaǵy sim-kartalardy aýystyrý kirgen. Qazirgi ýaqytta tergeý júrgizilýde, – dedi ІІM kıberqylmysqa qarsy is-qımyl departamentiniń bastyǵy Jandos Súıinbaı.

ІІM kıberqylmysqa qarsy is-qımyl departamenti uıaly baılanys operatorlarymen birlesip, ınternet-alaıaqtarmen jáne olardyń sybaılastarymen belsendi kúresti jalǵastyryp keledi.

Jyl basynan beri 9 myńnan astam nómir buǵattaldy. Olar arqyly 200 myń alaıaqtyq qońyraý shalynǵan. Kıberqylmysqa qarsy is-qımyl bólinisteriniń qyzmetkerleri 28 ınternet-alaıaqty, sim-box stantsııalarynyń 3 «operatoryn» ustap, 7 sim-box qurylǵysy men túrli uıaly operatorlardyń 285 sim-kartasyn tárkiledi.

Aıta keteıik, buǵan deıin Almatyda eki er adamnan 190 sim-karta men sim-box qurylǵysy tárkilendi.