Erkin kúresten tuńǵysh álem chempıony Rızabek Aıtmuhan olımpıadalyq salmaqqa aýysty

<p>Erkin kúresten Qazaqstan komandasynyń bas bapkeri Madııar Quramysov balýandardyń bıylǵy maýsymdaǵy kórsetkishin qorytyndylap, quramadaǵy ózgerister týraly aıtty, dep habarlaıdy <a href="Kazinform." target="_blank" rel="noopener">Kazinform</a> Ulttyq olımpıadalyq komıtettiń baspasóz qyzmetine silteme jasap.&nbsp;</p>

Bıyl otandyq erkin kúres sheberleri Azııa chempıonaty, álem birinshiligi men Azııa oıyndary syndy iri básekelerde baq synaǵan bolatyn. 

«Álem chempıonatynan bir altyn, bir qolamen oraldyq. Rızabek Aıtmuhannyń araǵa jyldar salyp tarıhty jańartqanyn bilesizder. Azamat Dáýletbekov qola medalmen birge, Olımpıada oıyndarynyń lıtsenzııasyn jeńip aldy. Bizge áli de joldama kerek. Jyldyń sońǵy jattyǵý jıynyn balýandar taýda ótkizedi. 18 kún boıy taýda jattyǵamyz. Jańa jylda jańa jarystar kútip tur», - dedi bas bapker.

Madııar Quramysovtyń aıtýynsha, aldaǵy maýsym óte jaýapty bolmaq. 

«Sáýir aıynda Bishkekte Azııa aımaqtyq lıtsenzııalyq týrnıri ótedi. Sol básekede taǵy da eki joldama jeńip alýdy maqsat etip otyrmyz. Bizdiń balýandar úshin 57 jáne 65 kelide lıtsenzııa alý qıyn bolmaq. Sebebi, bul salmaqtaǵy básekelestik álem boıynsha óte joǵary. Atalǵan týrnırge úlken daıyndyqpen barýdy josparlaýdamyz. Odan bólek, reıtıngilik týrnırler men Qazaqstan chempıonaty da bar», - dedi Quramysov. 

Qańtar aıynda Astanada ótetin Qazaqstan birinshiliginde lıtsenzııalyq týrnırge qatysatyn balýandar belgili bolady. Sol synda álem chempıony Rızabek Aıtmuhannyń da jańa salmaqtaǵy áýselesi anyqtalady. 

«Rızabek olımpıadalyq salmaq sanalatyn 97 kelige aýysty. Qazirgi tańda Azamat Dáýletbekovpen birge Osetııada jattyǵyp jatyr. Bul salmaqta Álisher Erǵalı syndy balýanymyz baryn da bilesizder. Kim myqty ekeni ulttyq chempıonatta sheshiledi. Sol básekede kim jeńse, lıtsenzııaǵa sol talasady», - dep qorytyndylady sózin bas bapker.