Erkin kúresten lıtsenzııalyq týrnırge joǵary deńgeıde daıyndalyp jatyrmyz - bas bapker

<p>ASTANA. KAZINFORM &ndash; Erkin kúresten Qazaqstan ulttyq quramasynyń bas bapkeri Madııar Quramysov balýandardyń Parıj Olımpıadasynyń lıtsenzııasy sarapqa salynatyn jarysqa óte joǵary deńgeıde daıyndalyp jatqanyn aıtty.</p>

«Biz qazir oqý-jattyǵý jıynyn Almaty oblysyndaǵy «Aqbulaq» olımpıadalyq bazasynda ótkizip jatyrmyz. Daıyndyq óte joǵary deńgeıde ótip jatyr. Balýandarymyzdy lıtsenzııalyq týrnırge babyna keltirip alyp barý - bizdiń basty maqsatymyz. Sondyqtan, ulttyq qurama músheleri tynbaı ter tógýde», - dep atap ótti bas bapker.

Sonymen qatar ol Olımpıada joldamasy sarapqa salynatyn dodaǵa kimder baratynyn da jasyrmady.

«Ózderińiz bilesizder, jaqynda Astanada kúres túrlerinen el birinshiligi ótti. Sol ulttyq birinshilikti ótkizýdegi maqsatymyz da lıtsenzııalyq týrnırlerge balýandardy irikteý bolatyn.

Endi Qyrǵyzstanda lıtsenzııalyq Azııa qurlyǵynyń irikteý týrnıri ótedi. Mine, sol jarysqa el chempıonatynda tek jeńimpaz atanǵan balýandar barady. Ári qaraı Túrkııada álemdik irikteý týrnıri bar. Barynsha olımpıadalyq salmaqta tolyq joldama alýǵa kúsh salamyz», - dedi bas bapker Quramysov.