Erkin Tuqymov álem elderine tónetin eń úlken qaýipti atady

ASTANA. QazAqparat – Barlyq memleket úshin eń úlken qaýip – táýelsizdiginen aırylý. Qazaqstanǵa qatysty mundaı qater joq, biraq soǵan qaramastan qandaı táýekelder týyndaýy múmkin ekendigi árqashan naqty baǵalaý kerek. Muny Azııadaǵy qaýipsizdik jáne yntymaqtastyq forýmy aıasynda BAQ ókilderiniń saýalyna jaýap bergen Qazaqstan strategııalyq zertteýler ınstıtýtynyń dırektory Erkin Tuqymov aıtty, dep habarlaıdy QazAqparat tilshisi.

«Barlyq elder úshin eń úlken qaýip – táýelsizdiginen aırylyp qalý. Bizde qazir mundaı qaýip joq, biraq soǵan qaramastan árqashan syrttan qandaı qater bar ekenin naqty baǵalaı bilý kerek. Bul biz aıtqandaı terrorızm men ekstremızm máselesi ǵana emes. Bul klımat jáne sý tapshylyǵy máseleleri», - dep toqtaldy QSZI dırektory BAQ ókilderiniń saýalyna jaýap bere otyryp.

Erkin Tuqymovtyń paıymyna saı, qazir Qazaqstanǵa túbegeıli ekonomıkalyq reformalar qajet.

«HHІ ǵasyr – Azııa dáýiri. Óıtkeni ol búkil álemniń ınnovatsııalyq jáne saıası ortalyǵyna aınalýda. Álem halyqynyń 60%-y Azııada turady. Sondyqtan biz Ortalyq Azııanyń naqty mańyzyn túsinýimiz kerek. Qazir bizge túbegeıli ekonomıkalyq reformalar qajet. Biz oǵan endi bet buryp jatyrmyz. Bul baǵytta kimmen birlese jumys istep, damý protsesin jalǵastyramyz? Meniń oıymsha, birinshi kezekte Azııa. Bul - Qytaı, Úndistan. Sondyqtan, meniń oıymsha, syrtqy saıasatta biz burynǵy ustanymdardan aıyrylmaýymyz qajet. Bul - kópvektorly saıasat», - dedi Erkin Tuqymov.

Ol sondaı-aq forým qorytyndysy boıynsha Prezıdent Ákimshiligi, tipti Memleket basshysynyń ózi úshin usynymdar ázirlenetinin atap ótti.

Eske salaıyq, buǵan deıin elordada Azııadaǵy qaýipsizdik jáne yntymaqtastyq forýmy ótip jatqanyn habarlap edik. Oǵan Azııa elderinen kelgen 60-tan astam sarapshy qatysyp jatyr.