Erkin kúresten bas jattyqtyrýshy Áset Serikbaev: Bapkerdiń armany - Olımpıadaǵa tolyq qurammen barý
Bas bapker jarystan elge oralǵan bette QazAqparat tilshisiniń saýalyna jaýap berip, «Saryqurlyq» birinshiligi jaıynda shaǵyn suhbat berdi.
- Keshe ǵana Úndistan astanasy Nıý-Delıde ótken kúres túrlerinen Azııa birinshiliginen eki altyn, tórt qola júldemen oraldyńyzdar. Jalpy shákirtterińizdiń jetistigine kóńilińiz toldy ma?
- Árıne, kóńilim tolady. 2 altyn, 4 qola medal - jaman kórsetkish emes. Jalpy, balýandarymyz úmitti aqtaı bildi. Joǵary deńgeıde óner kórsetti. Bizdiń qurama 2018 jyly da, 2019 jyly da 2 altyn alǵan bolatyn. Mine, bıyl da sol bıikten kórine bildik.
- Jarysqa attanbas buryn qansha medal alýdy josparlap edińizder?
- Bapker retinde qurlyq birinshiliginen bir altyn medal alsaq ta jaman bolmas dep josparlaǵanmyn. Ózderińiz kórgendeı, bir emes, ekai altynǵa qol jetkizdik. Josparymyz artyǵymen oryndaldy.
- Olımpıada aldyndaǵy «Saryqurlyq» dodasy jalpy nesimen este qaldy?
- Men úshin bul doda ózim baptaıtyn balýandar arasynan el qorjynyna ekinshi altyndy salǵan 125 keli salmaqtaǵy balýanymyz ıÝsýp Batyrmýrzaevtyń jetistigimen este qaldy. Batyrmýrzaev jas bola tura, «Saryqurlyqtaǵy» saqa balýandardyń barlyǵyn joldan taıdyryp, kútpegen jerden Azııa chempıony atandy. Bolashaǵynan úmit kúttiretin balýan ekenin kórsete bildi.
- Jalpy ózińiz ishki esebińizde kimderden medal kútken edińiz?
- Biz bári de júldemen oralsa eken dep tileımiz. Jalpy barǵan balýandarymyzdyń barlyǵy qarsylastaryn jyǵýǵa bar kúshterin saldy. Óz basym 57 keli salmaqta el namysyn qorǵaǵan Nurıslam Sanaev pen 86 kelide synǵa túsken balýanymyz Azamat Dáýletbekovten medal kútkenim ras. Ekeýi de júldeli orynǵa synyq súıem jerden, naqtyraq aıtsaq, qola medal úshin beldesýde qarsylastaryna jol berip qoıdy.
- Ótken jyldyń kúzinde elordamyzda lıtsenzııalyq álem chempıonaty ótkeni esimizde. Sol álemdik birinshilikte siz baptaıtyn balýandar úsh medal men qosa Tokıo Olımpıadasyna tórt joldama utyp aldy. Demek, ázirge erkin kúres sheberlerinde tórt joldama bar. Tolyq quramda barýǵa endi qansha joldama jetispeı tur?
- Ár bapkerdiń armany - Olımpıada oıyndaryna tolyq qurammen barý. Ózińiz atap ótkendeı, qazir tórt joldamamyz bar. Endi, bizge eki salmaqtan eki joldama jetispeı tur. Alda Olımpıada joldamalary sarapqa salynatyn eki úlken jarys bar. Sol eki dodada jetpeı turǵan eki joldamany jeńip alsaq, tolyq qurammen Olımpıadaǵa attanamyz.
- Elordada ótken lıtsenzııalyq álem chempıonatynda óz salmaktarynda Olımpıadaǵa joldama jeńip alǵan balýandardyń esimderin sol kezde atap ótken edik. Tórtjyldyq dodaǵa mindetti túrde sol balýandardyń ózderi bara ma, álde baratyn balýandardy bapkerler keńesi sheshe me?
- Bul suraqqa jaýap berý áli erterek. Óz basym aldyn-ala ton pishkendi asa unata bermeımin. Olımpıada oıyndaryna deıin áli bes aıdan astam ýaqyt bar. Oǵan deıin bizde kóptegen jarystar, jattyǵýlar bolady. Osy jarysta keıbir balýandar jaraqat alyp qalyp jatady. Ondaı sátterde birniń ornyna biri ketetin jaǵdaılar bolady. Sondyqtan, Olımpıadaǵa naqty kimderdiń baratyny týraly aıtý erterek.
- Aldaǵy josparlaryńyz týraly qysqasha aıtyp ketseńiz...
- Dál qazirgi josparymyz, joǵaryda atap ótkenimdeı, Olımpıadaǵa joldama beretin azııalyq jáne álemdik eki týrnırge jaqsy daıyndalyp, Olımpıadaǵa tolyq qurammen barý. Ary qaraı Olımpıadada medal alý.
- Áńgimeńizge kóp rahmet! Maqsat-tilekterińiz oryndala bersin...