Erkin kúres: qazaqstandyq balýandar Qyrǵyzstanda alty medal aldy

ASTANA. QazAqparat – Qyrǵyzstan astanasy Bishkek qalasynda ótken kúres túrlerinen reıtıngtik týrnırde erkin kúresten qazaqstandyq balýandar 1 kúmis, 5 qola medal aldy, dep habarlaıdy QazAqparat tilshisi.

Reıtıngtik týrnır qyrǵyzstandyq belgili sportshylar Bishkekte Qojamqul Qabauly men Ratbek Sanatbaevtyń qurmetine ótkizildi.

Saıys barysynda el quramasynan Syrbaz Talǵat (70 keli) fınalda qyrǵyz balýany Orozobek Toktomambetovke ese jiberdi. Esep – 2:3.

Al, Meırambek Qartbaı (57 keli), Jiger Zakırov (79 keli), Azamat Dəýletbekov (86 keli) qola júldege qol sozdy.

Sondaı-aq, budan buryn erkin kúresten 97 kelige deıingi salmaqta Nursultan Azov úzdik úshtikti túıindedi.

Eske salsaq, áıelder kúresinen Marına Sedneva (55 keli) men Jámıla Baqbergenova (72 keli) jeńis tuǵyryna kóterildi. Al, Irına Kazıýlına (65 keli) kúmis medalǵa qol jetkizdi.

Elimizdiń kúres túrleri federatsııasynyń habarlaýynsha, jylyna tórt reıtıngtik týrnır bekitilgen. Qazirge deıin mundaı jarystar Horvatııa men Egıpette ótkizilse, endi ol Qyrǵyzstanda jalǵasyp otyr. Tórtinshisi shilde aıynda Vengrııada jalaýyn kóteredi. Balýandar reıtıngtik týrnırlerde upaı jınaıdy. Nátıjesinde qyrkúıek aıynda Serbııada bolatyn álem chempıonatynda upaıdy kóp jınaǵan balýandar jartylaı fınal nemese fınalǵa deıin bir-birimen kezdespeıdi.