Eriktilerdiń nemen aınalysatynyn mektepten bastap oqytý qajet - Álisher Sadyq
«Aqtóbede tórt jyldan beri qaıyrymdylyqty tý etken «Júrekten júrekke» atty eriktiler toby jumys istep tur. Men sonda jetekshimin. Atyraý qalasynan taraǵan topty Aqtóbede Ámına degen qyz jańǵyrtqysy kelip, osy bastama keıin qoldaý tapty. Bastapqy kezde 17 erikti qurǵan top músheleriniń sany búginde 100-ge jetti. Eriktiler tobynyń uıymdastyrýymen 130-dan astam qaıyrymdylyq sharasy, aıtystar, qaıyrymdylyq keshteri, sporttyq sharalar, jármeńke jáne basqa da sharalar ótkizildi. Sonyń nátıjesinde 7 mln teńgege jýyq qarjy tústi. Onyń bári muqtaj otbasylarǵa, syrqat jandardyń ıgiligine jumsaldy», - dedi bólisti Álisher Sadyq forýmnyń «Men senemin» azamattyq bastamalar konferentsııasynda.
Onyń aıtýynsha, tórt jyldyń ishinde aýyrtpalyqtar men ózindik qıyndyqtar bolǵan, dese de ol máseleler sheshiledi.
«Elimizde aıtyp kelmeıtin tótenshe jaǵdaı kezinde eriktiler kóbinese jumyldyrylmaıdy. Olardyń sol apattyq jaǵdaıǵa kiretin ortaq tólqujaty bolsa degen usynysym bar. Frantsııada halyqtyń 19 paıyzy keminde bir ret erikti jumysymen aınalysady. Germanııa halqynyń 34 paıyzy aıyna 15 saǵatyn osy volonterlyq jumysqa arnaıdy. Irlandııa turǵyndarynyń 38 paıyzy, AQSh halqynyń 27 paıyzy, Reseı turǵyndarynyń 8 paıyzy volonterlyqpen aınalysady. Al bizde bul sala damı qoıǵan joq», - deıdi ol.
Álisher Sadyq eriktilik qyzmetti mektepte oqytý qajet ekenin atap ótti.
«Oqýshyǵa bilimmen qatar, qoǵamǵa kómek uǵymyn da túsindirý qajet. Shetelde osyndaı jumystar júrgiziledi. Eger mektep qabyrǵasynan sol aýmaqtaǵy kóshelerdiń tazalyǵyn qamtamasyz etý, alǵashqy kómek kórsetý, múmkindigi shekteýli azamattarmen qalaı jumys isteý kerek - osynyń bárin úıretsek, bolashaqta ózimiz qınalmaımyz. Múmkindik bolsa, aptasyna bir saǵattyq sabaq retinde engizýge bolady. Ol sabaqty belsendi erikti ótkizse degen usynysym bar. Osy qoǵamdyq sharalarmen, qaıyrymdylyqpen aınalysqan oqýshy bolashaqta elde bolyp jatqan áleýmettik máselelerdi kórip, ony sheshý joldaryn izdeıdi», - dep usyndy Álisher Sadyq.
Sondaı-aq ol eriktilerdiń tólqujatyn jasaýdy, olardyń ústinen qaraıtyn respýblıkalyq shtab qurý bastamasyn kóterdip otyr.
Eske sala ketsek, dál qazir Astanada «Azamattyq qoǵam jáne memleket: Dıalog. Seriktestik. Senim» taqyrybyndaǵy VIII azamattyq forým ótip jatyr. Elbasynyń qatysýymen ótetin aýqymdy shara eki kúnge sozylady. 35 taqyryptyq sessııaǵa azamattyq sektor, memlekettik organdar, bıznes-qurylymdar, halyqaralyq uıymdar, saraptamalyq qaýymdastyqtan 850 delegat jáne 150 spıker qatysýda. Sessııalar semınarlar, sheberlik synyptary, dóńgelek ústelder, pikirtalas alańdary, mınıstrlikter men vedomstvolar basshylarymen salalyq kezdesýler formatynda ótkiziledi.