Eriktiler qozǵalysyn qoldaǵan Prezıdentke alǵys aıtamyz - Aısulý Ernııazova
«Bıyl mamyr aıynda Qostanaıda ótken Qazaqstan-Reseı jastarynyń forýmyna qatysqan bolatynmyn. Osy jıyn barysynda volonterler aldaǵy jyldy eriktiler qozǵalysyn qoldaý jyly dep jarııalaýǵa usynys jasap, Prezıdent Qasym-Jomart Toqaev bul bastamaǵa qoldaý bildirdi», - dedi ol.
Sonymen qatar A. Ernııazova Jastar jylynyń ashylýynda Elbasy volonter stýdentterdiń shákirtaqysyn ósirýdi tapsyrǵanyn eske saldy.
«Osy ispetti sharalar bizdiń volonterlerdi yntalandyrýǵa yqpal etti, ıaǵnı qandaı da bir materıaldyq múdde turǵysynda emes, memleket tarapynan qoldaý jasalyp otyrǵandyǵy jáne volonterlerge jasalǵan qamqorlyq kóńil-kúıdi bir serpiltti. Al 15 shilde kúni ótken Úkimettiń keńeıtilgen otyrysynda Prezıdent Qasym-Jomart Toqaev kezekti ret volonterlik qozǵalystyń róli týraly atap ótti. Volenterlik uıymnyń tóraıymy retinde óz isine adal eriktini anyqtaý ońaı ekenin aıta alamyn. Osyndaı jastar óskeleń urpaqtyń arasynda aıtarlyqtaı artyp keledi», - dedi lıga tóraıymy.
Onyń sózine qaraǵanda, «Volonterler jyly» aıasynda jastarǵa úlken jaýapkershilik júkteledi.
«Biz qazirden bastap «Volonterler jyly» aıasynda «qandaı ıgi sharalardy usyna alamyz?» degen oı mazalaýda. Taıaý kúnderi biz volonterler Gımnin jazdyq jáne ony Qazaqstandaǵy barsha áriptesterimizge arnadyq. Ony bizdiń uıymnyń ınstagramm profılinen silteme boıynsha kóshirip alýǵa bolady. Jalpy, eriktiler qozǵalysyna erekshe mán berip otyrǵan Memleket basshysyna alǵys aıtqymyz keledi. Óıtkeni elimizdiń bolashaǵy úshin turǵyndardy jaýapkershilikke shaqyrýda, adamdardyń bir-birine qamqorlyqpen qaraýyna volonterlik qozǵalystan úırenetin tustary kóp. Osy oraıda biz ózimizdiń kúsh-jigerimiz arqyly elimizdiń gúldenýine eleýli úlesimizdi qosa alamyz», - dedi Aısulý Ernııazova.
Aıtaketeıik, Úkimettiń keńeıtilgen otyrysynda Prezıdent Qasym-Jomart toqaev kelesi jyl «Jastar jylynyń» jalǵasy retinde «Volonterler jyly» bolatynyn, jastarymyzdy belsendi volonterlik jumysqa tartý qajet ekenin atap ótti.