«Erikti tańdaý jasaıtyn sát keldi» - respýblıkalyq basylymdarǵa sholý

ASTANA. 12 qańtar. QazAqparat - Qazaq aqparat agenttigi respýblıkalyq basylymdarda 12 qańtar, beısenbi kúni shyqqan ózekti materıaldarǵa sholýdy usynady.

***

«Egemen Qazaqstan» gazetiniń jazýynsha, keshe Memleket basshysy Nursultan Nazarbaev Almatydaǵy rezıdentsııasynda ádebıet pen óner qaıratkerlerine Prezıdenttik jáne Memlekettik stıpendııalardy tapsyrdy.  «Sonymen keshe taǵy da júz­den astam ádebıet jáne óner qaıratkerleriniń otandyq máde­nıetti damytýdaǵy úlken eńbek­teri Prezıdenttik stıpendııalarmen atap ótildi. Olardyń arasynda Asanáli Áshimov, Zámzágúl Sháripova, Sábıt Orazbaev syndy teatr tarlandary, Bıbigúl Tó­­legenova, Ermek Serkebaev sııaq­ty án óneriniń sańlaqtary, Sherhan Murtaza bastaǵan qa­byr­­ǵa­ly qalamgerler, arqaly aqyn­dar bar», dep jazady basylym. Maqala «Ónerdiń sapasy eldiń sanasyna áser etedi» degen taqyryppen berilgen.

 Elimizdiń ár azamatynyń óz tańdaýyn jasaýyna úsh kún qaldy. 15 qańtarda Qazaqstannyń birneshe mıllıon saılaýshysy ýchaskelerge baryp, Parlament Májilisi men barlyq deńgeıdegi máslı­hat­tarda halyq múddesin qorǵaýǵa kimderdiń laıyqty ekenin anyqtaý úshin daýys beredi. Osyǵan baılanysty «Egemen Qazaqstan» gazeti QR Ortalyq saılaý komıssııasynyń tóraǵasy Qýandyq Turǵanqulovpen «Saılaý-2012» taqyrybynda oı bólisken. Basylym tilshisiniń barlyq saýaldaryna tuşymdy jaýap bergen ol: «Sózimniń sońynda saılaýshylar ti­zi­­­mine engen elimizdiń barlyq azamattaryna 15 qańtar qaı jaǵynan alǵanda da óte jaýapty kún ekenin aıtqym keledi. Óıt­keni, daýys berý quqyǵy árbir adamǵa jeke tıesili. Sondyqtan Qazaqstannyń árbir azamaty osy múmkindikti is júzinde paıdalanýy tıis. Bul óziń úshin de, el úshin de mańyzdy. Osy saılaý memleke­timizdiń keleshekke bastaıtyn jańa bir qadamy bolmaq», - deıdi. Suhbat «Erikti tańdaý jasaıtyn sát keldi» degen taqyryppen berilgen.

***

«Keshe Senat 2012 jyldaǵy óziniń alǵashqy jalpy otyrysyn ótkizdi. Ózin ózi tarqatqan Májilisten soń zań shyǵarýshy bıliktiń qos tizginin bir ýysta ustaǵan senatorlar az kúngi demalystan tyńaıyp, jańa jyldaǵy jumysyna qulshynyspen kelgeni kórinip tur. Aǵymdaǵy jyldyń birinshi basqosýynda-aq Senat onnan astam zań qabyldady. Alǵashqy otyrysta senatorlardyń talqysyna usynylǵan «Ulttyq ál-aýqat qory týraly» jańa redaktsııadaǵy jobanyń ózi merekeden keıingi mamyrajaı tirliktiń «selt etkizeri» ispettes bolǵanǵa uqsaıdy», - dep jazady «Alash aınasy» gazeti. Maqalada kóterilgen jaıtty basylymnyń búgingi sanyndaǵy «Senat «Samuryq-Qazyna» qyzmetine memlekettiń aralasýyn shektep tastady» degen taqyryptan egjeı-tegjeıli bile alasyzdar.

***

«Memleket basshysy Nursultan Nazarbaevqa Almatyǵa ju­mys sapary aıasynda qalanyń Alataý aýdanynda Indýs­trııa­lyq aımaqty qurý jobasy tanystyryldy», - dep jazady «Kazahstanskaıa pravda» gazeti. Indýstrııalyq aımaq - Al­ma­tynyń ekonomıkasynyń perspek­tıvalyq ósýiniń mańyzdy bó­ligi. Atalǵan joba zamanaýı ınno­­vatsııalyq negizde ónerkásip óndi­­risin odan ári damytý úshin negiz bolady, qalanyń jalpy óńirlik óniminiń ósimin qamtamasyz etedi. Almatynyń ózge aýdan­­daryn­daǵy óndirister Alataý aýdanyndaǵy Indýstrııalyq aımaqtyń aýmaǵyna toptastyrylatyn bolady. Bul megapolıstegi kólik jáne ekologııalyq jaǵdaıdy edáýir jaq­sartýǵa múmkindikter týǵyzady. Indýstrııalyq aımaqqa bar­­­ly­ǵy 76 ónerkásip jáne kom­mý­naldyq kásiporyndardy ornalas­tyrý josparlanýda. Olardyń qa­tarynda: 20 tamaq ónerkásibi kásiporny, 18 jeńil ónerkásip ká­sip­orny, 14 jıhaz, 7 far­ma­tsev­tı­ka­lyq, 4 hımııalyq, sondaı-aq ma­shına jasaý sala­syn­daǵy 13 kásiporyn bar.