Erikti Almatydaǵy qańtar oqıǵasy týraly: kómek kerek kezde shet qala almadyq

ALMATY. QazAqparat – Qasiretti qańtarda Almaty qalasyndaǵy tártipsizdiktiń kezdeısoq kýásiniń biri – volonter Ámirhan Hakımov, dep habarlaıdy QazAqparat tilshisi.

Megapolıste jappaı tártipsizdik 4 qańtarda bastaldy. Sol kúni tańerteń Ámirhan Hakımov ádettegi kóńil kúımen jumysqa shyqqan.

«Kúndegishe, tańǵy asymdy iship, saǵat 8-de úıden jumysqa shyqtym. Aıaldamada avtobýsty kóp kúttim, kóshede kólikter sırek eken. Sosyn metroǵa qaraı bardym. Jolda bir qarııa maǵan «Bul jerden tezirek ketkeniń jón» dep aıtty. Alǵashynda ne bolyp jatqanyn túsinbeı qaldym, keıinnen Abaı dańǵyly boıynda kele jatqan bir top adamdy kórdim. Bir er adamnyń modýldik polıtsııaǵa birdeńe laqtyrǵany esimde, ol zat tutana bastady. Bastapqyda ony mas shyǵar dep oıladym. Biraq 2-3 mınýttan keıin dybysty granatalar usha bastady. Men abdyrap qaldym, birneshe qadam artqa sheginip, buryla sala úıge qaraı júgirdim. Úıde aıaǵymnyń qanap jatqanyn kórdim», - dep esine aldy ol.

Ámirhannyń aıtýynsha, aıaǵyna áınektiń synyǵy kirgen eken. Ony aldyrý úshin buryn hırýrg bolyp jumys istegen zeınetker kórshisine júgingen.

«Kórshimnen kómek suradym, barlyq jaǵdaıdy túsindirdim. Ol aıaǵymdaǵy áınektiń synyǵyn abaılap shyǵaryp, perekıspen tazalap, tańǵyshpen orap berdi. Baqytyma oraı, jaraqat asa qaýipti emes edi. Biraz ýaqyttan keıin dárigerlerge qaraldym, asqynbady», - deıdi ol.

Aıta keteıik, Ámirhan Hakımov - Qazaqstan Qyzyl Jarty aıy qoǵamynyń volontery. Ol búlikshiler qıratyp tastaǵan Almaty qalasy ákimdiginiń ǵımaratyn tazalaýǵa atsalysyp, jaǵdaıy nashar otbasylarǵa azyq-túlik jınap, jetkizýge kómektesti.

«Tártipsizdikten keıin ákimdik ǵımaratyn tazalaýǵa kiristik. Bizge aldymen qalada júrýge, ǵımaratqa kirýge ruqsat berdi. Ǵımaratty tazalaý jumystary qaýipsizdik erejelerin saqtaı otyryp júrgizildi. Biz ózimizge berilgen nusqaýlyqty muqııat este saqtap, soǵan saı áreket ettik. Kaska, maska, jılet, qolǵappen qamtamasyz etti. Úshinshi qabatty tazalap jatqanda úıindiler arasynan tapanshalar, dybys shyǵaratyn granatalar, polıtsııa kıimderi, qalqandar, taıaqtar tabyldy. Biraq biz olarǵa qol tıgizgen joqpyz, bárin tirketý úshin dereý polıtsııa shaqyrdyq. Jalpy ǵımaratty tazalaýǵa 500-ge jýyq volonter atsalysty», - deıdi ol.

Sonymen qatar, erikti jaǵdaıy tómen otbasylarǵa, zeınetkerlerge, múmkindigi shekteýli jandarǵa azyq-túlik taratqanyn aıtady.

«Volonter bolyp júrgenime kóp boldy, mamandyǵym - temirjolshy, biraq basqa salada jumys isteımin. Múmkindiginshe, qaıyrymdylyqqa aqsha aýdaryp otyramyn. Memleket basshysynyń tapsyrmasymen «Qazaqstan halqyna» qoǵamdyq qory qurylǵanda men jáne áriptesterim qaıyrymdylyqqa aqsha aýdardyq. Jalpy maǵan adamdarǵa kómektesken unaıdy. Osyndaı qıyn-qystaý kezeńde, qańtar oqıǵasynan keıin men de shet qalmaı, memleketimizdiń, qoǵamymyzdyń damýyna úles qosqym keldi», - dep túıindedi sózin.