Erik Sultanov 44 soltústikqazaqstandyqqa «QR Táýelsizdigine 25 jyl» medaldaryn tabys etti

PETROPAVL. QazAqparat - Soltústik Qazaqstan oblysynyń ákimi Erik Sultanov óńirdiń jurtshylyǵymen kezdesti, dep habarlaıdy QazAqparat tilshisi óńir basshysynyń baspasóz qyzmetine silteme jasap. Kezdesýdi ashqan Erik Hamzauly memlekettiń qoldaýy men soltústikqazaqstandyqtardyń tabandy eńbeginiń arqasynda Táýelsizdik jyldary oblystyń barlyq saladaǵy kórsetkishteri eseleı óskenin atap ótti.

«Búginde oblysta agroónerkásiptik jáne ındýstrıaldy keshen, turǵyn úı qurylysy, kásipkerlik, áleýmettik sala belsendi damyp keledi. Bul jetistikter - sizderdiń árbirińizdiń eńbekterińizdiń jemisi. Táýelsizdik jyldary oblysta atqarylǵan sharýa az emes. Aldymyzda odan da aýqymdy mindetter tur. Osy oraıda barshamyz el erteńi jolynda bir kisideı jumyla eńbek ete beremiz dep senemin», - dep atap ótti óńir basshysy.

 

Kezdesý barysynda Qazaqstan Respýblıkasy memlekettiliginiń qalyptasýyna, egemendiginiń nyǵaıýy men áleýmettik-ekonomıkalyq damýyna qosqan eleýli úlesi úshin «Qazaqstan Respýblıkasynyń Táýelsizdigine 25 jyl» merekelik medalimen 44 soltústikqazaqstandyq marapattaldy. Olardyń arasynda eńbek ardagerleri, etnomádenı jáne qoǵamdyq birlestikterdiń, buqaralyq aqparat quraldarynyń jáne ózge de sala ókilderi bar.

Jıyn sońynda oblys ákimi Erik Sultanov qatysýshylardy Táýelsizdiktiń 25 jyldyq mereıtoıymen quttyqtap, el damýy jolyndaǵy eńbekterine tabys tiledi.