ERG kompanııasy medıaresýrsqa ıelik etýden ketedi - Aleksandr Mashkeevıch

ASTANA. QazAqparat – Eurasian Resources Group kompanııalar tobynyń dırektorlar keńesiniń tóraǵasy, aktsıoner Aleksandr Mashkeevıch ERG kompanııasy medıaresýrsqa ıelik etýden ketetinin aıtty, dep habarlaıdy QazAqparat tilshisi.

«Biz qazir bul máseleni talqylap jatyrmyz. Qazir ujymmen kelissóz júrgizip jatyrmyz. Biz ketip jatyrmyz, ERG kompanııasy medıaresýrstarǵa ıelik etýden ketedi. Óıtkeni, árkim óz isimen aınalysý kerek dep oılaımyn. ıAǵnı, taý-ken óndirýshi taý-ken bıznesimen aınalysýy kerek. Medıaholdıngter – óz aldyna bólek bıznes. Bul – derbes saraptama, derbes bilim, bólek adamdar. Bizge óz bıznesimizge, taý-ken-metallýrgııa qyzmetine kóbirek baǵdarlaný kerek dep oılaımyn», - dedi kásipker QR Prezıdentin ulyqtaý sharasynan keıin BAQ ókildeirne bergen suhbatynda.

Sondaı-aq, ol kompanııaǵa qarasty medıaresýrstyń qyzmetkerlerine taǵy bir múmkindik berilýi de yqtımal ekenin aıtty.

«Al ondaǵy qyzmetkerlerge kelsek, qazir talqylap jatyrmyz. Bilmeımin, bálkim olarǵa jalǵastyrýǵa múmkindik beretin shyǵarmyz. Ózderimen sóılesemiz. Óıtkeni bizdiń oıymyzsha, «Ekspress K» qazir jetekshi, mańyzdy medıaresýrstardyń biri bolyp esepteledi», - dedi Aleksandr Mashkeevıch.

Aıta keteıik, búgin Astanadaǵy Táýelsizdik saraıynda Qazaqstan Prezıdentiniń ulyqtaý rásimi ótti.

Foto: erg.kz