Erevandaǵy Qazaq tili, tarıhy jáne mádenıeti ortalyǵy Abaıdyń esimimen ataldy

EREVAN. QazAqparat– Erevan memlekettik ýnıversıteti (EMÝ) janyndaǵy Qazaq tili, tarıhy jáne mádenıeti ortalyǵyna Abaıdyń aty berildi.

Bul týraly QR Elshiligi QR Parlament Senaty tóraıymy Darıǵa Nazarbaevanyń atynan Ortalyqqa kompıýterlik tehnıka men ádebı oqýlyqtardy tapsyrýǵa arnalǵan shara barysynda EMÝ rektorynyń mindetin atqarýshy Gegam Gevorkıan málimdedi, dep habarlaıdy QazAqparattyń menshikti tilshisi.

Erevandaǵy EMÝ janyndaǵy Qazaq tili, tarıhy jáne mádenıeti ortalyǵyna QR Senat tóraıymy Darıǵa Nazarbaevanyń atynan kompıýter, ınteraktıvti taqta, sonymen qatar qazaq tilin úırenýge arnalǵan 120 qazaq sózdigi men jańa oqý materıaldary tapsyryldy. Ortalyqqa arnalǵan kompıýterlik tehnıkalar qazaq baǵdarlamalarymen jabdyqtalǵan, ol qazaq tilin úıretýdiń zamanaýı jáne tıimdi tásilderin paıdalanýǵa kómektesedi.

Shara barysynda Qazaqstannyń Armenııadaǵy elshisi Tımýr Ýrazaev EMÝ ákimshiligine, professor-oqytýshylar quramy men basshylyqqa qazaq tarıhyn, mádenıeti men tilin zertteýge qosyp júrgen úlesteri úshin alǵys aıtty.

«175 jyldyq mereıtoıy kezinde Abaıdyń tilin jańa qurylǵylardyń kómegimen armıan stýdentterine úıretý - qazaq ádebıeti jáne poezııasymen tanysyp, eki el arasyndaǵy mádenı sabaqtastyqty nyǵaıtýǵa kómektesedi. Al Darıǵa Nazarbaevanyń Ortalyqqa bergen syıjazbasy eki el arasyndaǵy mádenı-gýmanıtarlyq qarym-qatynasty damytýǵa aq tilek bolady», - dep atap ótti shara barysynda elshi T.Orazaev.

EMÝ rektorynyń mindetin atqarýshy Gegam Gevorkıan ýnıversıtet basshylyǵy Ortalyqqa Abaı esimin berý týraly sheshim qabyldaǵanyn málimdedi.

«Byltyr biz erekshe oqıǵanyń kýási boldyq, «Qazaq ádebıetiniń antologııasy» armıan tilinde jaryq kórdi. Bul eki eldiń ádebıetshileri, ǵalymdary men lıngvısteri seriktestiginiń ozyq úlgisi. Bıyl Abaıdyń 175 jyldyǵy mereıtoıynyń kýásibolamyz»,- dep atap ótti akademık Gegam Gevorkıan.

Sonymen qatar, ol shara barysynda ýnıversıtet basshylyǵy Ortalyqqa keńirek oryn qarastyratynyn aıtty.

EMÝ janyndaǵy Qazaq tili, mádenıeti jáne tarıhy ortylyǵy Qazaqstan Respýblıkasynyń Armenııadaǵy elshiliginiń qoldaýymen 2010 jyldyń 19 tamyzynda ashylǵan bolatyn.