Erevanda kepilge alynǵan adamdardy qutqarý kezinde bir polıtseı kóz jumdy (FOTO)
polıtsııa bólimshesinde kepilge alynǵan adamdardy qutqarý operatsııasy barysynda bir polıtseı kóz jumyp, taǵy ekeýi jaralandy.
Armenııanyń UQQ-niń málim etkenindeı, quqyqqorǵaýshylar kepildegi eki adamdy alyp shyǵa alǵan. Ázirge olardyń esimderi jarııalanǵan joq.
Sońǵy málimetter boıynsha, qazirgi ýaqytta qalǵan adamdardy qutqarý boıynsha arnaıy operatsııa daıyndalyp jatyr. Sondaı-aq, birqatar Parlament depýtattary, atap aıtqanda, Nıkol Pashınıan radıkaldarmen kelissózder jasaýǵa talpynýda. Jergilikti BAQ-tyń habarlaýynsha, dál osy N.Pashınıannyń bastamasymen radıkaldar tobynyń basshysymen júrgizilgen kelissózder barysynda ol basyp alynǵan polıtsııa ǵımaratyna kire aldy jáne sol jerde beınetúsirilim jasaı aldy. Keıin ol vıdeo birqatar aqparattyq agenttikter arqyly tarady. Sonymen birge, ol qarýly toptyń kóshbasshylarymen tildese aldy.
BAQ-qa bergen suhbatynda N.Pashınıan radıkal toptyń quramynda 25-26 adam baryn aıtty. Kelissózder barysynda olar eldegi barlyq saıası sebeptermen sottalǵan tulǵalardy bosatýdy jáne eldegi bıliktiń aýysýyn talap etken kórinedi.
Onyń ústine qarýly top eger polıtseıler shabýyl jasaıtyn bolsa, olar tıisti túrde jaýap berýge daıyn ekendikterin habarlaǵan.
«Qazirgi ýaqytta olardy bılikke tapsyrýdy uıymdastyrý boıynsha qarýlanǵan top múshelerimen kelissózder júrgizilýde», - delingen habarlamada.
«Armenııanyń quqyq qorǵaý organdary oqıǵany tolyq baqylaýda ustap, jaǵdaıdy sheshý boıynsha barlyq sharalardy jasaýda», - delingen UQQ-niń habarlamasynda.
Oqıǵa ornyna armenııalyq azamattar kóp jınalǵan. Olardyń qatarynda «Quryltaıshy parlament» radıkaldy qozǵalysynyń jaqtaýshylary, polıtsııa bólimshesinde birneshe azamatty kepilge alǵan radıkaldy toptyń isin jaqtap otyrǵan azamattar da bar. Jınalǵandar arasynda qyzbalyqqa salynǵan azamattardy polıtseıler arnaıy kólikpen alyp ketip jatyr.
Aıta ketý kerek, «Quryltaıshy parlament» qozǵalysynyń músheleri kóp jyldan beri elde bılikti taqtan taıdyrýǵa áreket etip keledi. Onyń jaqtaýshylary áleýmettik-ekonomıkalyq damýdyń tómen kórsetkishteri tikeleı bıliktegilerdiń saıasatymen baılanysty dep sanaıdy. Bunyń aldynda, qozǵalys músheleri el bıligine qarsy qozǵalystyń qarýsyz ádisterin qoldanyp kelgen bolatyn (jappaı aktsııalar, buqaralyq mıtıngiler jáne ózge de sharalar).
Qozǵalys kóshbasshylary Jıraıra Sefılıan, Varýjan Avetısıan men Garegın Chýgaszıan armıan halqyn qazirgi bılikti zańsyz taıdyrýǵa ashyq túrde shaqyryp keldi.
FOTO: PAN Photo / Varo Rafayelyan