Ereýilshiler Baǵdattaǵy AQSh elshiligi aýmaǵynan ketti

BAǴDAT. Anadoly-QazAqparat – «Hashdı Shaabı» ırandyq shııt jasaǵynyń adamdary Baǵdattaǵy AQSh elshiligi aýmaǵynan ketti. Olar eki kún boıy elshilikte narazylyq aktsııasyn ótkizgen bolatyn, dep habarlaıdy QazAqparat Anadoly agenttigine silteme jasap.

Bul jóninde Irak áskeriniń Birikken jedel qolbasshylyǵynan málim boldy.

«Baǵdattaǵy AQSh elshiliginiń aldyna jáne aınalasyna jınalǵan búkil demonstranttar dıplomatııalyq mıssııanyń aýmaǵynan ketti, al shatyrlar jınap alyndy» delingen habarlamada.

Shahardaǵy AQSh elshiliginiń qaýipsizdigin ıraktyq áskerı kúshter qamtamasyz etip jatyr, dep málim etti Irak áskeriniń Birikken jedel qolbasshylyǵy.

Sherý kezinde Baǵdattaǵy AQSh elshiligi konsýldyq jumysyn toqtatqan bolatyn.

Munyń aldynda «Hashdı Shaabı» óz jaqtastaryn Baǵdattaǵy AQSh elshiligindegi narazylyq aktsııasyn toqtatýǵa shaqyrǵan edi, alaıda demonstranttar bul úndeýge qulaq aspady.

Narazylyq aktsııasy AQSh áskerı-teńiz kúshteriniń «Hashdı Shaabı» jasaǵynyń Iraktyń batysyndaǵy Al-Anbar provıntsııasynda ornalasqan bazasyn atqylýyna túrtki boldy.

Eske sala keteıik, AQSh-tyń memlekettik hatshysy Maık Pompeo Qazaqstandy qosa alǵanda, 5 memleketke saparyn keıinge qaldyrǵan bolatyn. Bul sheshimdi ol Baǵdattaǵy AQSh elshiliginde bolǵan ereýilderge baılanysty qabyldaǵan.