Ereksheligi bar teatr Astanada óner kórsetti
Bul ujymdardyń quramynda negizinen Soltústik Qazaqstan oblysyndaǵy estý qabileti nashar balalarǵa arnalǵan arnaıy (túzetý) mektep-ınternatynyń tárbıelenýshileri men túlekteri óner kórsetedi.
Máýlen Áshimbaev kezdesý barysynda balalardyń shyǵarmashylyǵyna shyn júrekten rızashylyǵyn bildirdi jáne teatrdyń kórkemdik jetekshisi Olga Rostovşıkovaǵa osyndaı mańyzdy jobany tabysty iske asyryp kele jatqany úshin alǵys aıtty. Sondaı-aq ol ujymǵa únemi qoldaý kórsetip otyrǵan Quralaı Túspekova bastaǵan Ulttyq delfıı komıtetiniń jumysyn da aıryqsha atap ótti.
«Kedergisiz jáne ınklıýzıvti orta qurýǵa yqpal etetin osyndaı bastamalardy memleket pen qoǵam tarapynan qoldaý asa mańyzdy. Mundaı jobalar balalarǵa jeke jáne shyǵarmashylyq turǵydan damýǵa, áleýmettik ortaǵa beıimdelýge, sondaı-aq, ózin-ózi tanytýǵa múmkindikter beredi. Erekshe qajettiligi bar balalardy yntalandyrý úshin osyndaı bastamalardyń mańyzy zor», – dedi Máýlen Áshimbaev.
Sonymen qatar Senat Tóraǵasy bıyl jeltoqsan aıynda elordada #SENSITIVE biregeı teatrynyń shyǵarmashylyq konsertin uıymdastyrýǵa qol ushyn beretinin aıtty. Palata Spıkeri astana qonaqtary men turǵyndaryn balalarǵa qoldaý kórsetýge jáne atalǵan qoıylymǵa qatysýǵa shaqyrdy.
«#SENSITIVE erekshe teatrynyń ártisteri óte daryndy. Olar ónerge de, ómirge de qushtar. Mýzykany jan dúnıesimen sezinip, joǵary deńgeıde bıleıdi. Teatr ártisterine zor densaýlyq, baq-bereke jáne tolaıym tabys tileımin. Aldaǵy josparlaryńyz ben armandaryńyz oryndala bersin», – dedi Máýlen Áshimbaev.
Aıta keteıik, jobaǵa qatysýshylar álemniń túrli elderinde ótken kóptegen bedeldi halyqaralyq baıqaýlarda birneshe ret jeńimpaz bolyp, júldeger atandy. Jaqynda olar Astanada respýblıka kúnine arnalǵan mańyzdy kontserttik baǵdarlamaǵa qatysyp, sátti óner kórsetti.