Erekshe muqtajdyǵy bar balalarǵa bilim berý shyǵyny 2 ese kóbeıedi – Prezıdent kómekshisi
«Ulttyq qoǵamdyq senim keńesiniń 25 aqpandaǵy besinshi otyrysynda Memleket basshysy erekshe qajettilikteri bar balalardy qoldaý boıynsha birqatar tapsyrmalar berdi. Qazirdiń ózinde sol tapsyrmalardyń bir bóligi iske asyryldy. Atap aıtsaq, erekshe bilim berý qajettilikteri bar balalardy qarjylandyrýdyń buryn qoldanylǵan jan basyna shaqqandaǵy normatıvi eki esege ulǵaıdy», - dep jazdy Prezıdent kómekshisi.
Sondaı-aq, ol 26 maýsymda «Qazaqstan Respýblıkasynyń keıbir zańnamalyq aktilerine ınklıýzıvti bilim berý máseleleri boıynsha ózgerister men tolyqtyrýlar engizý týraly» QR Zańy qabyldanyp, erekshe muqtajdyǵy bar balalardy oqytýda arnaıy psıhologııalyq-pedagogıkalyq qoldaý boıynsha memlekettik tapsyrysty iske asyratyn normalar bekitilgenin eske saldy.
«Memlekettik tapsyrys 2022 jylǵy 1 qyrkúıekten bastap iske asyrylady. Kórsetilgen norma erekshe muqtajdyǵy bar balalardy ýaqytyly qoldaýmen qamtýdyń kaýqymyn keńeıtedi. Sonymen qatar, osy Zań sheńberinde bilim berý qyzmetterin kórsetý salasynda jańa tásilder ázirlenip, bekitildi. Atap aıtqanda, jalpy bilim beretin mektepter men balabaqshalarda erekshe muqtajdyǵy bar balalardy psıhologııalyq-pedagogıkalyq súıemeldeýdiń arnaıy qyzmetteri qurylatyn bolady. Bul Ulttyq keńes aıasynda júzege asyrylǵan úlken jumystyń bir bóligi ǵana», - dep jazady Erlan Qarın.
Onyń aıtýynsha, Ulttyq keńestiń bastamalaryn iske asyrý aıasynda 80-nen astam normatıvtik-quqyqtyq akti, onyń ishinde 19 zań qabyldanǵan.