Erekshe qorǵalatyn tabıǵı aýmaqtar alańy keńeıtiledi
Zań jobasynyń negizgi maqsaty - ósimdikter dúnıesin qorǵaý jáne paıdalaný salasyndaǵy qoǵamdyq qatynastardy retteýdi qamtamasyz etý, tabıǵı ósimdik resýrstaryn ári ósimdik túrleriniń gendik qoryn saqtaý men kóbeıtý, sondaı-aq olardy utymdy paıdalaný úshin quqyqtyq negiz jasaý.
Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń málimetine qaraǵanda, qujat aıasynda ósimdikterdiń bıoáralýandyǵyn saqtaý úshin ekonomıkalyq, jaǵdaılar jasaý, ekologııalyq qaýipsizdikti qamtamasyz etý, ósimdikter dúnıesiniń resýrstaryn ornyqty saqtaýdy jáne utymdy paıdalanýdy qamtamasyz etýge baǵyttalǵan ekonomıkalyq tetikterdi endirý eskerilgen. Sonymen qatar ósimdikter dúnıesi obektilerin qorǵaý jáne paıdalaný salasyndaǵy zańdylyq pen quqyqtyq tártipti nyǵaıtý, bıoáralýandyqty saqtaý jónindegi halyqaralyq mindettemelerdi oryndaý mindetteri qamtylǵan.
Kórsetilgen mindetterdi iske asyrý úshin zań jobasynda ósimdikter dúnıesin, onyń ishinde ósimdikterdiń sırek kezdesetin jáne quryp ketý qaýpi tóngen, relıkti jáne endemıkalyq túrlerin saqtaý jáne qorǵaý, sondaı-aq ósimdikter dúnıesine túgendeý júrgizý, memlekettik monıtorıng jáne memlekettik kadastr júrgizý jónindegi normalar kózdelgen.
Sonymen qatar, bıologııalyq áralýandyqty uzaq merzimdi saqtaýǵa jáne ósimdikterdiń baǵaly túrleriniń ósimin kóbeıtýdi qamtamasyz etýge kepildik beretin erekshe qorǵalatyn tabıǵı aýmaqtar alańyn ulǵaıtý iske asyrylmaq.
«Qujatta ósimdikter dúnıesi salasyndaǵy jalpy memlekettik mindetterdi sheshý eskerilgen. «Ósimdikter dúnıesi týraly» Zańnyń normalaryn tolyq iske asyrý úshin Orman, jer, kásipkerlik, bıýdjet kodeksterine, sondaı-aq «Ruqsattar jáne habarlamalar týraly», «Erekshe qorǵalatyn tabıǵı aýmaqtar týraly» jáne «Jaıylymdar týraly» zańdarǵa túzetýler engizý talap etiledi. Zań jobalaryn qabyldaý teris áleýmettik-ekonomıkalyq jáne quqyqtyq saldarǵa ákep soqtyrmaıdy», - dedi Ekologııa, geologııa jáne tabıǵı resýrstar vıtse-mınıstri Álııa Shalabekova.