Erekshe qajettilikteri bar jasóspirimder túrli mamandyqty ıgerip shyqty
34 jasóspirim jergilikti kolledjderinde «Aspaz», «Kondıter», «Tigin isi», «Sándik-qoldanbaly óner» mamandyqtary boıynsha oqýdy sátti aıaqtady. Jobany «Bolashaq» korporatıvtik qory «Ár bala mektepke barýǵa laıyqty» baǵdarlamasy aıasynda Astana qalasy ákimdiginiń jáne AMANAT partııasynyń qoldaýymen júzege asyrǵanyn atap ótken jón.
7-11 synyp oqýshylaryna arnalǵan pılottyq joba Qoǵamdyq tamaqtandyrý jáne servıs kolledjinde, Menedjment, bıznes jáne bilim kolledjinde bastaý alǵan. Jobaǵa aýtızm, Daýn sındromy, Apert sındromy, epılepsııa, aqyl-oı damýy jeńil tejelgen, Týrett sındromy, psıhıkalyq damýdyń keshigýi jáne psıhıkalyq-sóıleý damýynyń keshigýi bar 13-18 jas aralyǵyndaǵy jasóspirim qatysqan.
Jobanyń maqsaty – erekshe qajettilikteri bar jasóspirimderge áleýmettik beıimdelýge, kásiptik bilim alýǵa jáne jumysqa ornalasýǵa kómektesý. Oqytý 5 aıǵa sozylǵan. Osy ýaqyt ishinde kásibı daǵdylardy meńgerip, tártipti jáne táýelsiz bola bastaǵan. Kásibı oı-órisi keńeıip qana qoımaı, bolashaqta jumysqa ornalasýǵa degen senimdilikti arttyra túsken.
«Bolashaq» qorynyń Qamqorshylyq Keńesiniń Tóraıymy Dınara Gaplannyń aıtýynsha, pılottyq jobanyń arqasynda mektepke deıingi, mektep jáne orta arnaýly bilim berý uıymdaryndaǵy alańdardy qamtıtyn úzdiksiz oqytý júıesin qurýǵa múmkindik ashylǵan.
«Astana – balabaqshalar men mektepterde aýtızm bar jáne basqa da mentaldyq buzylystary bar balalarǵa arnaıy alań ashylǵan Qazaqstandaǵy jalǵyz qala. Endigi jerde jergilikti ákimdiktiń qoldaýymen erekshe balalardyń kolledjderge túsýine jaǵdaı jasalyp otyr. Jobaǵa qoldaý kórsetken qala ákimdigine, AMANAT partııasyna jáne áleýmettik kásipkerler qatarynan seriktesterimizge zor alǵys aıtamyn. Bizdiń túlekter kásiporyndarda óz paıdasyn tıgize alady dep senemiz, bul joba – olardyń qoǵam ómirine qosylýynyń mańyzdy kezeńi bolmaq», - dedi Dınara Gaplan.
Erekshe balanyń anasy Ksenııa Tsýn balasynyń «Aspaz» mamandyǵyn ıgerip shyqqanyn aıtty.
«Meniń ulym óz meıramhanasyn ashýdy armandaıdy. Bul joba erekshe balalardyń qajetti mamandyqty ıgerýine ári úlken ómirden óz oryndaryn tabýyna úmit syılaıdy. Jobany uıymdastyrýshylarǵa alǵysym sheksiz», - dedi ol.
Aıta keteıik, bıyl 9 synypty bitirgen 8 erekshe bala kolledjge oqýǵa qabyldanǵan.
Esterińizge salsaq, buǵan deıin «Bolashaq» korporatıvtik qory Qazaqstan fýtbol federatsııasynyń qoldaýymen erekshe balalarǵa arnalǵan UNI Football League dep atalatyn biregeı jobanyń júzege asyrǵanyn jazǵan edik.