Erekshe qajettilikteri bar daryndy balalarǵa arnalǵan jańa joba jarııalandy

ASTANA. QazAqparat – Mádenıet jáne sport mınıstrligi «Arman asýlary» atty áleýmettik pılottyq jobany qolǵa aldy. Maqsaty – eldegi erekshe bilim berý qajettilikteri bar daryndy balalarǵa qoldaý kórsetý, shyǵarmashylyq baǵytta damytý. Joba balalar jyly aıasynda júzege asyrylyp otyr, dep habarlaıdy QazAqparat vedomstvonyń baspasóz qyzmetine silteme jasap.

Gala-kontsertke qatysqan balalardy Mádenıet jáne sport mınıstri Dáýren Abaev quttyqtap, ınklıýzıvti bilim berý men qoǵamdy damytýda mundaı jobanyń mańyzy zor ekenin atap ótti. Elimizdegi erekshe balalardyń ónerin ushtaýǵa baǵyttalǵan festıval respýblıkamyzdyń ár aımaǵyndaǵy daryndy jastardyń basyn qosady.

«Óner – adamnyń janyn ǵana emdemeıdi, onyń tánine de tirek bolady. Balalardyń talantyn ashýda mundaı alańdar qashanda qajet. Sondyqtan, osy jobany júzege asyrýǵa atsalysqan azamattardyń barlyǵyna alǵys aıtamyn. Sizder balalardy baqytty, al qoǵamdy meıirimdi etýge úles qosyp otyrsyzdar», - dedi Dáýren Abaev.

Gala-kontsertte Roza Rymbaeva, Aıjan Nurmaǵambetova, Qurmash Mahan, Saltanat Meńdiǵalıeva, Álibek Álmadıev, Rýhııa Baıdýkenova, Dıdar Abdýhalyq, Gúldana Akımova (fleıta) syndy tanymal artıster, «Astana sazy» memlekettik folklorlyq ansambli, «Melomen» toby, Turan folklorlyq-etnografııalyq ansambli, Forte Trio jáne Saz&Soul shyǵarmashylyq ujymdary balalarmen birge óner kórsetti.