Erekshe bilim berý qajettiligi bar balalar sany 55 myńǵa jetti

ASTANA. QazAqparat - Jańa oqý jylynda elimizdiń mektepterinde erekshe bilim berý qajettilikteri bar (EBQ) oqýshylardyń sany artty. 2021-2022 oqý jylynda ınklıýzıvti synyptarda 49 myńnan astam erekshe bala oqysa, bıyldyń ózinde olardyń sany 55 myńǵa jýyqtady, dep habarlaıdy QR Oqý-aǵartý mınıstrliginiń baspasóz qyzmeti.

Bul mektepterde erekshe jaǵdaı jasaý jáne jańa normatıvtik quqyqtyq aktilerdi ázirleý men qabyldaýdyń arqasynda múmkin bolyp otyr.

«Memleket basshysy óz Joldaýynda bilimniń qoljetimdi jáne ınklıýzıvti bolýy keregin atap ótti. Jalpy bilim beretin mektepterde erekshe balalardy oqytýǵa jaǵdaı jasalyp jatyr. Erekshe balalardyń bilim berý mekemesine kedergisiz kirýi úshin pandýstar, taktıldi joldar, arnaıy tutqalar jáne basqa da qurylǵylar ornatyldy. Mektepterde pedagog-assıstent laýazymy engizilgen, olar erekshe balalardyń bilim berý uıymdaryna beıimdelýine kómektesedi. Sonymen qatar memlekettik standartta oqý josparlary men baǵdarlamalarynyń varıatıvtiligi men ıkemdiligi qamtamasyz etilgen. Olar erekshe bilim berýdi qajet etetin balanyń jeke erekshelikterin eskere otyryp beıimdelgen», - deıdi Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵynyń dırektory Áıgerim Kýderınova.

Sondaı-aq «Bilim týraly» zańǵa ózgerister men tolyqtyrýlar engizilip, erekshe bilim alýdy qajet etetin balalardyń sanaty keńeıtildi. Olarǵa ártúrli ekonomıkalyq (az qamtylǵan, tolyq emes otbasylardan shyqqan balalar), áleýmettik sebeptermen (mıgranttar, kandastar jáne t.b.), sonyń ishinde densaýlyǵyna baılanysty oqýda qıyndyqtarǵa tap bolǵan balalar jatady.

Odan bólek, jergilikti atqarýshy organdardyń quzyretine EBQ bar balalardy oqytý úshin arnaıy jaǵdaılardy qamtamasyz etý kiredi. Qabyldaý erejelerin buzǵany jáne erekshe bilim berý qajettilikteri bar balalardy tárbıeleý men oqytýda arnaıy jaǵdaı jasamaǵany úshin bilim berý uıymy basshysynyń jaýapkershiligi kúsheıtildi.