Erekshe balasy bar analar ortopedııa buıymdaryn monetızatsııalaýdy surap otyr
Bul másele oblys ákimdiginiń jaýapty mamandary men máslıhat depýtattarynyń «Neırobalalar ǵajap bar» qoǵamdyq birlestiginiń ókilderimen kezdesýinde talqylandy.
Oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń aıtýynsha, arnaıy bekitilgen «Jol kartasynda» jergilikti atqarýshy organdardyń quzyretindegi máseleler qarastyrylǵan. Onda múgedektigi bar adamdarǵa jylyna bir beriletin áleýmettik kómekti arttyrý, erekshe balalarǵa arnalǵan oıyn alańdaryn ashý, ınvataksı úshin kólik sanyn kóbeıtý sekildi máseleler qamtylǵan.
«Múmkindigi shekteýli jandar barlyq áleýmettik qyzmetti tikeleı áleýmettik portaldan alady. Bul – múmkindigi shekteýliler úshin óte tıimdi tásil. Qazir múgedektigi bar adamdardyń basym bóligi áleýmettik qyzmetti portal arqyly alýǵa mashyqtandy. Alaıda, ondaǵy ortopedııalyq quraldardy bir adamǵa shaqtap alý múmkin bolmaı otyr. Aıaqqa, ne qolǵa arnalǵan ortopedııalyq quraldar ásirese, balalarǵa dál kelińkiremeı qalady. Sol sebepten, ony monetızatsııalaǵan jón. Sodan keıin mindetti gıgıenalyq quraldarǵa jatatyn jórgekter sany bir jylǵa 730 danadan keledi. Bul – óte az», - deıdi Azamat Mámbetov.
«Jol kartasynda» múgedektigi bar adamdarǵa qatysty týyndaǵan problemalyq máselelerdi sheshý joly qarastyrylǵan. Oblys ákimdigi áleýmettik portalda beriletin jórgekter sanyn 730-dan 1460-qa kóbeıtý úshin Eńbek jáne halyqty áleýmettik qorǵaý mınıstrligine usynys joldaǵan.
«Qazir mınıstrlikte bul máselege baılanysty normatıvtik-quqyqtyq aktilerge ózgerister engizý qarastyrylyp jatyr. Indýstrııa jáne ınfraqurylymdyq damý mınıstrligine erekshe bala tárbıelep otyrǵan otbasylardy baspanamen qamtý úshin arnaıy kezek qarastyryp, turǵyn úıdi satyp alý mehanızmin jetildirý jóninde usynystar engiziledi», - dep málim etti Azamat Mámbetov.
Eske sala ketelik, budan buryn Atyraýda erekshe balalardyń ata-anasy qoǵamdyq kólikte tegin júretinin jazǵan edik.