Erekshe balalarǵa bilim berý memlekettik tapsyrys arqyly kórsetiledi

NUR-SULTAN. QazAqparat – Erekshe bilim berýge qajettiligi bar balalarǵa túzetý kómegin kórsetýge arnalǵan memlekettik tapsyrys engiziledi. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Sońǵy ýaqytta erekshe bilim berýge qajettilikteri bar balalar sany kóbeıip jatyr. Osy sanattaǵy balalardyń erekshe qajettilikterin anyqtalǵannan keıin, olardy qurdastarymen qatar oqytý úshin arnaıy pedagogterdiń kómegi qajet. Eń bastysy, mamandar ár balanyń qajettilikterine súıene otyryp jeke túzetý baǵdarlamasyn daıyndap ony júzege asyratyn bolady», - dep jazdy mınıstr Facebook paraqshasynda.

Onyń atap ótýinshe, mundaı kómek alǵan balalar ınklıýzıvti ortaǵa jaqsy beıimdeledi. Sonymen qatar, oqý materıalyn áldeqaıda ońaı ıgeredi. Al keıbireýleri erekshe kómekke muqtajdyqtan tolyǵymen arylady. Olarmen defektologtar, psıhologtar, logopedter jáne basqa da mamandar jumys isteıdi.

«Qazirgi ýaqytta mundaı balalardyń sany óskendikten, arnaıy ortalyqtar jetispeıdi. Ýaqytyly kómek bolmaǵandyqtan, bul erekshelikterdi túzetý jáne balany bilim berý ortasyna qosý qıynǵa soǵyp jatyr. Endi bul norma memlekettik emes uıymdarǵa osyndaı qajet ortalyqtardy ashýǵa jáne kórsetilgen qyzmetter úshin bıýdjetten qarjy alýǵa múmkindik beredi. Bul mehanızm jeke balabaqshalardyń qyzmetimen birdeı. Esterińizge sala keteıin, dál osyndaı tetik arqyly balalardy mektepke deıingi tárbıe berý mekemelerimen qamtýdy birden arttyrǵan edik», - dedi Ashat Aımaǵambetov.