Erekshe balalarǵa arnalǵan anımatsııa mektebiniń alǵashqy 30 túlegi oqýyn támamdady
QR Aqparat jáne qoǵamdyq damý mınıstrliginiń baspasóz qyzmeti taratqan aqparatqa qaraǵanda, 2021 jyldyń naýryz aıynda bastalǵan jobanyń alty aılyq oqý kýrsyn arnaıy irikteýden ótken 30 qatysýshy sátti támamdap, arnaıy sertıfıkattarmen marapattaldy.
Oqý kýrsy aqysyz negizde, jeke anımatsııalyq stýdııalardyń atsalysýymen qaıyrymdylyq joba retinde júzege asyryldy. Balalardy oqýǵa qajet arnaıy planshetter men ózge de tehnıkalyq quraldarmen «Qazaqstan» telekorporatsııasy qamtamasyz etken.
Mınıstrliktiń bastamasymen balalarǵa sapaly bilim berý maqsatynda halyqaralyq baılanystar ornatyldy. Ońtústik Koreıanyń Mýltıplıkatsııalyq fılmderdi nasıhattaý agenttigimen Yntymaqtastyq memorandýmyna qol qoıylyp, kelisim jasaldy. Nátıjesinde Ońtústik Koreıa men Japonııanyń úzdik mýltıplıkator mamandary anımatsııa mektebiniń qatysýshylaryna onlaın dáris oqyp, sheberlik sabaqtaryn ótkizdi.
Erekshe bilim alý qajettilikteri bar balalarǵa bolashaqta mamandyǵyna aınalatyn kásipti úıretý arqyly jańa múmkindik syılaý, erekshe balalardy áleýmettik beıimdeýge járdemdesý jáne olardyń bos ýaqytyn tıimdi ótkizýdi uıymdastyrý maqsatynda qurylǵan mekteptiń alǵashqy túlekteri Qazaqstannyń túrli aımaǵynda turatyn 14-16 jas aralyǵyndaǵy daryndy balalar. Oqý baǵdarlamasy onlaın formatta, arnaıy sabaq kestesine saı júrgizilgen.
Oqýshylar alǵashqy aıda «Anımatsııa negizderi» taqyrybyndaǵy jalpy dáriske qatysyp, anımatsııa salasymen tanysty. Keıin qyzyǵýshylyǵy men beıimine, múmkindigine qaraı 2D animation, 3D animation jáne Stop Motion toptaryna bólinip, bilim aldy.
«Sátti júzege asyrylǵan jobaǵa qatysýǵa ótinimderdiń áli de tolastamaýyna baılanysty Anımatsııa mektebiniń jumysyn turaqty túrde jalǵastyrý josparlanyp otyr»,-delingen habarlamada.